close
Recesión

Recesión

2013-11-01economíaRecesión853Visitas

Colas en el paroIgual ye que tamos falando de coses distintes. Yo entiendo que tar en Recesión (póngolo con mayúscules a posta) ye tener 6 millones de paraos nel país. Ye que ca día zarren, entren en concursu d’acreedores o desllocalícense empreses qu’acueyen a cientos o miles de trabayadores. Ye que los mozos que s’independizaren un día, tengan que tornar a casa a vivir de la pensión del gûelu y de que a los comedores sociales tengan que dir persones qu’enantes yeren clas media. Tar en Recesión ye que les pequeñes empreses y los autónomos nun tengan perres de los bancos pa poder financiase, que a los pensionistes se-yos prepare un futuru inmediatu nel que, tolos años, van perder poder adquisitivu. Tar en Recesión ye que nun s’atienda na sanidá pública a los estranxeros que nun tengan trabayu o papelos, como si dambes coses nun fueren xuntes. Tar en Recesión ye que la distancia ente los que más tienen y los que menos, seya cada día mayor… Too eso, y dalgo más que nun pongo pa nun cansar, ye lo que supón una Recesión económica.

Pero agora vienen unos cuantos “cantamañanes” oficiales a dicinos qu’España yá nun ta en Recesión, que yá salimos d’ella. Y debe ser porque la xente ta tan avezada a oyer babayaes de los nuestros responsables, polo que naide garró un bidón de gasolina y fue a pega-y fueu al Ministeriu d’Economía, al d’Industria, al de Facienda y yá, de pasu, al Institutu Cervantes que diz que namás hai cuatro llingües n’España, porque esto yá paez más bien una provocación. ¿Quién coño salió de la Recesión? ¿Qué ye que, porque el INE da un datu dalgo meyor que los anteriores acabóse yá con tolo que retafilé más arriba? ¿Colos paraos, pensionistes, quiebres, probes en xeneral y en particular, etc. etc.? Tien de ser que, como dixi al empiezu, tamos falando de coses distintes. De la Recesión qu’ellos dicen debieron salir esos 100 españoles más ricos que publiciten los periódicos. Esos qu’encabeza’l dueñu de ZARA que tien declaraos 48.000 millones d’euros (¿cómo se puen facer eses perres trabayando?). Esos 100, y dellos más, sí que salieron de la Recesión, o meyor dicho, ye qu’ellos nun entraron nunca n’ella. A eso debe referise’l Gobiernu cuando nos anuncia esa patagüeyada.

Porque si ye que, delantre la situación na que tamos, pue dicise n’Economía que salimos de la Recesión ye que, comoechadora de cartas sabíemos, la Economía nin ye una ciencia, nin val pa nada. Yo siempre tuvi eso perclaro -y dalgo sé del asuntu-, pero ca día que pasa fáise más claro. Por poner un exemplu más: L’últimu Premiu Nobel d’Economía diéronlu a tres economistes de cuyu nome nun quiero alcordame. Pues bien, dos d’ellos, nun ye que tuvieren tesis distintes, ye que les teníen contraries. O seya, ún dicía lo contrario del otru. Pal primeru lo más importante yeren los mercaos, y pal segundu, los mercaos nun valíen pa nada y yeren pura ficción. ¿Cómo va a ser eso una ciencia? Ye como si valiera dicir qu’esiste la llei de la gravedá, y al tiempu que nun esiste. ¡Que nun fadien! Pa eso val más que nos llean los posos del café o nos echen les cartes. La sospecha que yo tengo ye que los que manden tapecen les sos manipulaciones embaxo un barniz «científicu», como si les decisiones que tomen pa esplotar a los d’abaxo vinieren rexíes por unes lleis incamudables. ¡A quién quieren engañar!

En fin, qu’esto nun tien igua. Y que nos dexen seguir cola Recesión de siempres porque asina, polo menos, tienen dalguna disculpa. Porque si, pa encima, nun hai recesión vamos a empezar a echa-yos la culpa a ellos de lo mal que lo tamos pasando.