Hai dalgo que nun acabo d’entender y entiendo menos, entovía, por qué a naide paez importa-y. La custión ye: ¿Por qué el Sporting «regala» el campeonatu de la Copa del Rey un añu tres otru? ¿Por qué nun quier competir? Recuerdo, porque tengo bona memoria, cuando’l nuestru equipu competía con ganes nesti tornéu y pasaba munches eliminatories, ente’l contentu de la so afición. Nun fai falta recordar que l’ equipu sportinguista llegó a dos finales de Copa, en dos años siguíos, perdiéndoles na menos que col Real Madrid y el Barcelona. Pero, ensin llegar a tanto, siempre prestaba velu competir colos grandes (Sevilla, Valencia, Atlhetic de Bilbao…) a doble partíu, dando emoción en dambos campos.
Ensin embargu, dende hai yá demasiaos años, y nun sé el porqué,
empéñense en «tirar» el tornéu, sacando a tol equipu reserva y dexando una impresión d’equipu probe y desganáu. ¿Daveres los xugadores xueguen tantos partíos como pa nun poder facelo de xemes en cuando un día pente selmana? ¿Qué preparación física tienen unos rapazos de ventitantos años pa nun poder aguantar noventa minutos nuna competición tan guapa? Porque, amás, la Copa del Rey si se disputase en serio, podría ser una compensación de les males andances de la Lliga. Un aliviu y entretenimientu pala probe afición que paga y recibe mui poco a cambiu ya, inclusive, un aliviu tamién pa la tesorería del Club.
Pero Abelardo y lo últimos entrenadores qu’hubo , «pasen» olímpicamente del tornéu, faciendo poco menos que’l ridículu, añu tres añu, ensin querer competir en serio. Esti añu con una medianía como ye l’Eibar, un equipu supermodestu, col que perdieron los dos partíos. Y la Xunta Direutiva a veles venir, comos si la cosa nun fuere con ellos. ¡Hai que lo tomar en serio, home!
