Ta mui de moda, dende va tiempu, la llamada «novela negra escandinava» con una serie d’autores, la mayoría mozos, qu’asitien en tierres nórdiques l’aición de les sos aventures. Son, más o menos, como cualquier novela negra, colos sos crímenes (cuasi siempre apavoriantes), los asesinos en serie (y en serio) y los inspectores o, más de moda entovía, les inspectores, porque hai que tar acordies colos tiempos. Equí yá tenemos a Petra Delicado de la gran Alicia Giménez Barttlet, dende 1996, y ensin danos nenguna importancia. Nesti campu yo sigo cola mio señaldá pol queridísimu Inspector Wallander, del siempre lloráu Henning Mankell, qu’ Odin lu tenga nel so Valhalla. Nun tien comparanza con toos estos sucesores, que non discípulos.
«La dama» ye una novelina mui entretenida d’un autor islandés de nome Ragnar Jónasson que remana, con soltura, toos esos elementos que conformen l’universu de la novela negra. La protagonista (nun puedo llamala «la mocina» porque ta a piques de xubilase) ye una inspectora, veterana, con un pasáu abegosu que diremos descubriendo, y que tien un ultimu encargu enantes de la xubilación, que tien de resolver nun curtiu espaciu de tiempu. De pasu, l’autor danos unes pincelaes del paisaxe y el paisanaxe de la islla y, pese al xelu y a les baxes temperatures, vemos cómo tamién hai problemes comunes con nos, como por exemplu el de la emigración. Novela de pocos espacios, anque mui abiertos, y pocos personaxes porque asina tien de ser nesi país qu’algamó la so independencia de Dinamarca nel sieglu XX. Glaciares, grandes ermos, montañes y ríos formen el decoráu precisu pa una historia que se sigue con interés y que tien un final bastante sorpresivu que -quitando a los llistos de siempre- nun esperábemos. Toi seguru que, al que-y preste el xéneru (como a min) nun dexará de presta-y esta novelina anque nun vaya a dexanos memoria munchu más tiempu que’l de la so llectura.
