Dixéronlo por activa y por pasiva, y testeraron hasta comencer a la xente que l’austeridá yera la única receta posible escontra la crisis qu’ellos mesmos crearen. El Bancu Central Européu, la Merkel, el FMI comandáu por esa antipática de la Lagarde y nun digamos yá n’España, col amigu Rajoy y el so ministru d’Economía, el caradura esi de Luis de Guindos que, ente los sos merecimientos, figura’l de ser miembru del Conseyu Asesor de Lehman Brothers, la financiera que orixinó el tomate intercasa que vieno depués. Pese a que los Estaos Xuníos salieron muncho primero de la crisis cola receta contraria, equí, entovía agora, siguen cola cantinela de l’austeridá que, inclusive, el PP llevó na so campaña ellectoral.
Munchos diximos qu’esa receta fue un inventu perguapu pa quitar drechos yá reconocíos, facilitar despidos y engrandar les diferencies sociales, pero nada. L’eslogan siguió alantre y esa clas política de corbata y cara seria sigui soltándonos el coñazu como un verdaderu «mantra».
Lleo esti día una entrevista (nel diariu «El Comercio») cola prestixosa socióloga Saskia Sassen, Premiu Príncipe
d’Asturies de Ciencies Sociales nel 2013 que diz, ente otres coses: «La austeridad nos ha mostrado sus riesgos, más concentración de riqueza y ventajas para un 20%, los más ricos, todos con altos ingresos y con muchos recursos. Seguir con esta modalidad de inversión y este nivel de especulación produce más empobrecimiento de una gran mayoría de la población.» Y más alantre sigui diciendo: «La austeridad fue una trampa: justificar el empobrecimiento para ‘salvar economías’ mientras unos pocos se enriquecían. Eso fue un engaño enorme. Pedir sacrificios en nombre del rescate de la economía nacional en este contexto es un engaño, un abuso, una profunda injusticia… Pero con el nombre de ‘austeridad’ suena como si fuese algo positivo».
Esta señora vieno al nuestru País a dar una conferencia nel Parllamentu Asturianu, entamada pola Xunta Xeneral y la Universidá d’Uviéu. Dende ellí habría que glayar a los políticos europeos, y al señor Rajoy y la so camarilla, que son unos mentirosos y que persaben de sobra les consecuencies que les sos polítiques traen pa la xente. Pa la gran mayoría de la sociedá. La profesora Sassen acaba volver a dicilo alto y nidio. ¡Que los sigan votando (eso dígolo yo)!
