Como la xente cada día ta peor informao y nun tien interés en dir a la fonte clara pa enterase, circulen les noticies troceaes, con corta y pega peronde-y paez al enteráu de turnu y al manipulador profesional. Equí furrula eso del «dicen que dixo» o «paez que daquién opinó que», p’arrimar les áscuares a la sardina propia que, dacuando, nun llega nin a parrocha.
Asina, les declaraciones del ministru Garzón a un periódicu inglés encartiaron pa qu’esi aprendiz de mentirosu, con máster na Universidá nel País de Nunca Inxamás que se llama Pablo Casado, xunto col so conxuntu cómicu-musical de los Boys del PP, saquen la cara por una práutica que debiere esapaecer del nuestru (y de toos) País: Les macrogranxes. Y asina, diciendo falar a favor de los ganaderos, meten nel mesmu sacu a los qu’ honradamente trabayen por un consumu responsable y respetuoso pa col mediu ambiente, con esos otros qu’empuerquen la tierra y l’agua amestando a eso el maltratu animal. Nieguen estos salvapatries que n’España esistan eses granxes-campu-de-concentración como les del grupu Fuertes (Cefusa, El Pozo, y otres) con capacidá pa producir mas de 650.000 llechones al añu, lo que da idea de lo que tamos falando. Acorripiaos nun cachu pequeñu de tarrén onde nun se pue producir l’alimentu nin xestionar debidamente los escrementos, tal y como denuncia la ONG Greenpeace.
El resultáu de too ello ye la contaminación de les agües soterránies, emisiones de gases d’efeutu ivernaderu, deforestación pa pastos y cultivu d’alimentu pal ganáu, daños a la salú y abusos a los animales. Amás, son una falsa solución escontra’l despoblamientu rural. Un modelu de ganadería industrial que ta espolletando en llugar d’otru sostenible, afitáu nel territoriu y xenerador d’emplegu. Sabíemos que’n política val cuasi too, pero en dalgún llugar habrá que poner les llendes pa qu’estos políticos de baxu vuelu, especialistes na desinformación nun sigan medrando coles sos mentires.
Semeya: Diariu de Valladolid
