Nunes declaraciones que recueye esti día “El Comercio”, l’incombustible Arturo Fernández, “el chatín”, afirma que “solo los tontos creen en las ideologías”, afondando nesa idea qu’inventó’l superfacha Gonzalo Fernández de la Mora nel so llibru “El ocaso de las ideologías”, especie de catecismu franquista obsoletu dende’l so aniciu. Don Arturo diz encesamente que ye que yá nun hai izquierdes nin dereches, que les hubo cuando la guerra pero qu’agora ya nun esisten. D’ehí lo de los «tontos».
Un –o seya yo- mira pa dientro y nun tien más remediu que reconocese “tonto” siguiendo’l baremu de don Arturo. Porque si, como diz la RAE la ideoloxía ye un “conjunto de ideas fundamentales que caracteriza el pensamiento de una persona, colectividad o época, de un movimiento cultural, religioso o político, etc.”, tengo d’almitir que sí tengo un conxuntu d’idées fonderes que conformen la mio forma d’actuar y comportame na vida. Unes son culturales, otres relixoses o antirrelixoses, otres sociales y munches polítiques. Sí, polítiques. Porque según don Arturo ¿ye lo mésmo ser fascista, totalitariu, racista, xenófobu, homófobu… que nun selo? Serálo pa él y pa los que nun tienen nengún modelu d’actuación na vida. ¿O acasu la ideoloxía d’un miembru de Mélicos ensin fronteres ye la mesma que la de Rodrigo Rato? ¿Nun será qu’esa ideoloxía qu’esapaeció ye la de los fachas, los millonarios, los qu’abeyen d’un a otru llau a ver que puen sacar de beneficiu… o seya, los que nunca nun la tuvieron?
Yo nun sé si don Arturo Fernández tuvo dalguna vez ideoloxía o non, pero’l so analís social de que les ideoloxíes esapaecieron y toos somos igual de sinvergüences ye mui peligrosu. Abúltame qu’hai xente nel mundu, muncha, qu’amuesa tolos díes que sí tien ideoloxía, y abaste con echar una güeyada y ver toos esos que trabayen colos miles d’inmigrantes, colos drogadictos, colos necesitaos de fame o de compaña, o los que, cenciellamente, quieren llantar na sociedá un poco más d’etica y de moral pa constatalo. Asina que, porfa, que’l “chatín” nun nos meta a toos nel mesmu sacu qu’él.
