El personaxe d’El Zorro fue creáu pol escritor y periodista norteamericanu Johnston McCulley a principios del sieglu pasáu. Tratábase -el personaxe- d’un descendiente d’españoles, home xusticieru que lluchaba escontra les autoridaes opresores nel territoriu de Los Ángeles. Esti arquetipu dio llugar a una réplica española que fue’l famosu «El Coyote», de J. Mallorqui. La marca del Zorru facía referencia a una muezca que’l famosu xusticieru facía a los enemigos y que consistía nuna lletra «Z» que-yos marcaba cola espada na frente. Asina sabíase que yeren malos y que la prósima vez que s’enfrentara a ellos mataríalos.
Hai un puntu llamáu Juan Carlos Gafo (con esi apellíu taba predestináu) que polo visto dirixía una cosa llamada «Alto Comisionado del Gobierno» (¡manda madre!), que quier asonsañar al personaxe de McCulley grabándonos a sangre, y nun sé si tamién a fueu, la so propia marca: la Marca España. Una marca que s’emplega escontra los «malos españoles», o seya, independentistes, nacionalistes, discrepantes en xeneral. Y asina, remanando hábilmente la espada, coloca en tola frente un «catalanes de mierda» a los que xiblaron al himnu español nuna ceremonia deportiva. Nun digo yo que tea bien que, nun actu aceptáu poles autoridaes catalanes, que yá sabíen lo que diba a pasar, se xible al himnu de los anfitriones. Si nun queríen que la seleición española nadare ellí, nun haber pidío la cellebración del campeonatu. Pero, en tou casu, el xiblar ye siempre una opción del que, polo que seya, nun ta d’alcuerdu colo que se cellebra. Lo mesmo que l’aplaudir. Si val lo uno tien de valir l’otro.
En cualquier casu, y aún aceutando la «descortesía» de los «xibladores», lo que nun se pue tolerar d’un cargu políticu, y menos entovía de dalguién que quier representar esa cursilería que se llama «Marca España», emplegue esi llinguax barriubaxeru y faltón escontra tou un pueblu, por más que llueu lo matizare. La diplomacia (y eso va col cargu) ye, precisamente, nun dexase llevar pelos sentimientos sinón pela razón y la concordia. Pero mirando’l fechu dende otru puntu de vista, ta mui bien lo asocedío porque, nestos momentos, eso que llamen Marca España, que pretende desplicar a los forasteros cómo ye la xente d’equí, axústase asina más a la realidá. Una realidá de chorizos, sobornos, corrupción, incompetencia y cobardía política. D’esi mou, el señor Gafo lo que fai ye, en realidá, amosar too eso dende la so atalaya del Altu Comisionáu pente medies de los insultos. Asina la xente pensará: ¡Coime, si el que representa a la Marca España compórtase asina, cómo sedrá tolo demás…! Y tendrá razón. O seya qu’esa salida de «pata bancu» lo que vien a suponer, nel fondo, ye un exerciciu de tresparencia. Y ¿nun queríen facer precisamente una llei pa eso…?