close
La miseria, ehí al llau

La miseria, ehí al llau

2013-03-30Mélicos ensin Fronteres1461Visitas

Verja en MelillaDacuando, somorguiaos nes nuestres pequeñes miseries, neses corrupteles que día tres día ocupen les planes de los periódicos y les imáxenes de la tele, escaecémonos de que, ehí al llau, a pocos kilómetros d’onde vivimos, hai otra realidá muncho más dura, muncho más miserable. Otra realidá ensin Bárcenes, nin Urdangarines, nin Corinnes… Y con otru «corralín» muncho más grave que’l que tienen en Chipre, pues el d’ellos nun ye un «corralín» qu’afeute al dineru, sinón que ye otru qu’afeuta a les persones. Son ellos y elles los que tán metíos nun «corralín» que los caltién prisioneros nunos llugares de pasu, camín de lo qu’un día suañaron: dexar la miseria atrás y algamar esa Europa que ye símbolu de llibertá, de progresu, de vida… Pero esa Europa nun ye la de los sos suaños y nun quier saber nada d’ellos. Nin siquier que se conoza la so esistencia. Poro ye tan importante’l llabor que tán faciendo organizaciones como Mélicos ensin Fronteres, y otres munches, dando conocencia de la situación d’estes persones, de los sos sofrimientos.

Nel reportax qu’amiesto darréu, pue vese’l percorríu que faen esos emigrantes y los llugares onde queden deteníos, acorripiaos, ensin poder llegar al so destín. Convién velu, y siguir a eses muyeres que nel so camín son violaes y maltrataes, o esos mozos qu’una y otra vuelta traten de saltar la verxa de Melilla, dexando parte del so sangre nes espines que l’arrodien. Ye importante que veamos y lleamos estos informes. Seguro que nun vamos poder facer muncho por esa xente, pero polo menos hai que tener la información, el conocimientu, el saber qu’esisten y que tamién tienen drechu a una vida meyor. O cenciellamente a una vida, porque lo que tienen agora nun lo ye. En definitiva, hai que tener, polo menos, mala conciencia. Yo téngola.
http://www.atrapadosenmarruecos.org/#/atrapados