Va a paecer que soi un oportunista por emplegar un términu tan de moda (por desgracia) na sociedá española y nos medios de comunicación, pero nun ye asina. Porque, n’efeutu, nel Diccionariu Esencial de la Lengua Española, de la RAE, nel términu «Desahuciar», na so tercera aceición diz: «Quitar a alguien toda esperanza de conseguir lo que desea«. Entós, ta mui claro: los asturianos tamos desahuciaos de la nuestra llingua, pues quitáronnos toa esperanza d’igualdá col castellán, de tener un réxime xurídicu como les demás llingües del Estáu.
Ye, pues, ésti un momentu nel que, ente les lleis que se baraxen pa evitar los desahucios, haya una que tamién evite’l nuestru, porque tener que dormir na cai ye dalgo mui triste, pero que nun puedas utilizar la llingua que t’enseñaron tos pás y tengas que columbrar como, pasín a pasu, esa llingua se va morriendo, tamién ye una traxedia.
Lo curioso del asuntu ye qu’esa llei que nos salvaría a nosotros del desahuciu yá esiste. Nun ocurre como la otra, qu’entovía tienen que la facer, aprobala y llueu principiar a aplicala en tola so casuística, que va a ser complicada. Nel nuestru casu, la proteición pa que nun durmamos na cai (ye un dicir) depende namás de la voluntá d’unos señores que se sienten, cómodamente, nun Parllamentu, llamáu dende tiempos inmemoriales Xunta Xeneral del Principáu, y cuya misión debería ser gobernar pa tolos asturianos, nun sólo pa una parte. Ta claro que, si hubiere conflictu d’intereses, los intereses de la mayoría deberíen prevalecer sobre los de la minoría, pero esti nun ye’l casu. El reconocimientu de la oficialidá de la llingua asturiana nun produz nengún efeutu negativu na parte de los asturianos que nun quieran emplegala. Ye más, sábese que munchos asturianos que nunca nun van a utilizala, son favoratibles a la so oficialidá. ¿Ónde ta pues el problema? ¿Por qué tenemos que siguir, una parte non pequeña de los asturianos, desahuciaos de la nuestra llingua? Yo quiero saber el porqué.
Los políticos que vienen gobernándonos dende l’aniciu de los tiempos (democráticos), fueron camudando les sos
oxeciones a la llingua cola fin de nun la facer cooficial. Primero nun yera una llingua. Depués nun yera una llingua… como les demás. Más depués que la oficialidá yera mui cara… Y agora que toes eses coses, y munches más que va tiempu que quedaron desmontaes, pasaron a meyor vida ¿cuál ye, en realidá, la oxeción que ponen pa nun declarala cooficial? Que me la digan Y si ya me la dixeron que, porfa, me la repitan porque se m’escaeció.
Y ye que nun hai nenguna oxeción RAZONABLE pa nun facer cooficial al asturianu. Nun la hai. Y por eso nun la dan. Dicen el PSOE y el PP: non ye que nosotros nun lo llevamos nel programa. ¿Y esi ye un razonamientu válidu? Que-yos digan a eses probes families que queden na cai, que nun puen facer nada escontra’l desahuciu porque nun lo lleven nel programa. ¡Qué babayada! Tolo contrario, tengo a mano una Proposición non de Llei que presentó na Mesa del Congresu de los Diputaos el Grupu Parllamentariu Socialista, qu’ente otres munches coses diz lliteralmente:
«…Durante estos veintisiete años, el desarrollo del Estado de las Autonomías ha supuesto, también en el terreno de la pluralidad lingüística, un éxito. Ha demostrado que la protección e impulso de las lenguas propias de las diferentes Comunidades Autónomas en las que rige un régimen de cooficialidad lingüística no sólo no se ha producido en menoscabo de la lengua común, sino que ha generado una dinámica de convivencia lingüística que es la característica principal de la vida cotidiana en nuestros pueblos y ciudades.» Y más alantre: «…los ciudadanos tienen derecho a usar, de acuerdo con su libre elección y con plena validez jurídica, (el sorrayáu ye míu), etc.» Y yá pa nun cansar más…: «…el uso de las lenguas es un derecho de los ciudadanos y que corresponde al Estado garantizar ese derecho y esa libertad…» Esti escritu, fecháu nel Palaciu del Congresu de los Diputaos ye del 9 d’avientu de 2005, y nun ta firmáu pol Partíu Socialista de Marte o d’Andrómeda, sinón por Ramón Jáuregui Atondo, Daniel Fernández González y Diego López Garrido. ¿Conoceránlos?
Entós, y fino ya col «rollu», si eso ye lo qu’opina’l Partíu Socialista Obreru ESPAÑOL, ¿por qué los asturianos, que somos bonos españoles, non como esi Mas que se quier separtar d’España, siguimos desahuciaos de la nuestra llingua? ¿Por qué nun podemos tener los mesmos drechos que los demás si, amás, como ellos mesmos dicen, ye tan bona y tan xusta la cooficialidá? Nun lo entiendo. Que me lo despliquen.
