Añu 6.000 a.C. En dalgún llugar de centroeuropa, en plenu cambiu al neolíticu, una muyer cazadora de nome Dira, marcha del pobláu que la vio ñacer y onde vive una esistencia pacetible, anque primitiva, en cata d’unos animales mitolóxicos, de los que namás oyo falar a los vieyos ya intuyó en dalgunos escuros dibuxos qu’adornen el campamentu. Son los mamuts. Eses montañes vives qu’un día vieron quebrada la so esistencia por mor d’una caza espantible que cuasi acaba con ellos. Los que pudieron colaron lloñe arrastriando’l so misteriu. Pero Dira nun quier morrer ensin velos de cerca. Ensin sentir la so presencia milenaria. Y fai d’esi deséu, l’oxetu de la so vida. Asina, entama un viaxe a los oríxenes del mundu, ellí onde too s’acaba y sólo queda la mar, porque sabe, nun entiende cómo, pero sábelo, qu’una d’eses montañes vives, l’últimu mamut ta esperando por ella. LLeva namás una bolsa, l’azagaya y l’hachu de mano. Frente a ella, un arriesgáu camín que tien que percorrer, enllenu de pilancos y dificultaes. ¿Podrá Dira cumplir el so deséu o quedará nel camín, como esos güesos que va atopando de dalgún caminante que la precedió?
Siglu XXI. D’una aldea probe de Mongolia escapa un home llamáu Khünbish, un paria que nun tien pa dar de comer a la muyer y al fíu y que vive una esistencia vacia y ensin sentíu. Sólo hai una posibilidá de llograr el dineru que necesita p’algamar una vida digna cola familia: dir al fin del mundu, les más remotes rexones de Rusia, cerca del círculu polar árticu, onde se cree que permanecen sapozaos los antiguos mamuts y, con muncha, muncha suerte, cavar nel duru xelu hasta estraer un colmillu, ayalga mui preciada que podría sacalu de la miseria. Nel camín va atopase con paisaxes y personaxes que-y fain más llevaderu’l viaxar. Pero, de magar que’l viaxe avanza, les condiciones tórnense más y más difíciles.
El sevillanu Álex Prada ye mélicu y escritor, fundamentalmente poeta. Y esi calter de poeta trescala toes y cada una de les páxines de la so novela, averándola a un lirismu mui prósimu a la poesía. Too ta cuntao con pausa, buscando la pallabra precisa, la espresión novedosa, el sentimientu humanu a flor de piel. Novela pa lleer sele, saborgando les páxines una a una y dexándose enllenar por un rellatu qu’avanza hacia un final que conxuga les dos histories, y fai que los protagonistes formen un conxuntu armoniosu cola Ñatura y nos tresmitan esa sensación d’armonía que nun se ruempe cola pallabra «Fin». Dafechamente recomendable.
