Soi un cuasi obligáu visionador de la TPA, la cadena asturiana de televisión porque, pese a los cantos pastoriles y rurales de los nuestros gobernantes, na casina onde resido nun barriu ente Deva y Pión, nun tenemos internet y la tele reduzse a la 1, la 2 y otres de nomes raros que ponen siempres anuncios. Seguro que tamién la vería n’otres circunstancies, porque me presten les noticies de cerca casa y nes «cadenones» estatales nun nos faen nin puñeteru casu, nin siquier poles tormentes. Pues bien, como fiel siguidor de la nuestra tele, ponme de mui mal humor l’usu que nella se fai de la nuestra llingua, arrequexada en programes etnográficos, etnolóxicos, o de mui mal gustu.
Y ye que, amás, esos programes paecen calcaos unos d’otros, como fechos a multicopista, con un o una llocutor o llocutora qu’anda d’un sitiu pa otru de la nuestra xeografía entrugando les mesmes coses a la mesma xente. Y si nun ye la mesma, ye mui asemeyada. Pa ello empleguen esi asturianu coloquial d’andar por casa, que me paez mui bien que salga na tele, porque asina ye como fala muncha xente, pero que nunca tien d’agotar l’usu que debería tener la llingua asturiana. Quiero dicir, y digo, qu’echo en falta un emplegu más cultu del asturianu y, sobre too, qu’abarque a los programes normales de la tele: telediarios, deportes, magacines… y nun entiendo como talos esos bodríos que ponen a la hora cimera de la nueche, con paisanos mazcaraos de muyeres faciendo risión, como nos vieyos tiempos, del mou de falar de la nuestra xente.
Una televisión autonómica nun tien sentíu ensin un usu normalizáu de la llingua en tou tipu de programes. Y entiéndase que nun digo en «tolos» programes, pero sí en «tou tipu» de programes. Lo que nunca pue ser ye una televisión más, en concurrencia coles xeneralistes, pa poner películes de vaqueros o otru tipu de programes de valir discutible. Asina que, a ver si pal añu nuevu los que manden na TPA, o los que manden a los que manden na TPA principien a tomase más en serio la normalización de la nuestra llingua, que debiere ser una de les xeres pa les qu’esti tipu de televisiones esisten. Pedirémoslo a los Reis Magos.
