close
La trampa rescampla

La trampa rescampla

2014-06-17Monarquía o República493Visitas

Mapa EspañaCreo que voi dexar pol momentu’l tema Monarquía o República, porque resulta yá tan masuñáu qu’aburre. Tou «quisqui», ente los que m’alcuentro, da la so opinión, lo cual ta sostituyendo al famosu referendum, qu’ehí ye onde daveres debiéremos dala y que, amás, fuere vinculante. Porque, anque toos damos la nuestra opinión, éstes nun valen lo mesmo. Unes danse en casa, nel chigre, na oficina o faciendo la compra. Y otres caltiénense dende plataformes mediátiques, televisiones, radios, prensa escrito… Eses valen más, y paez que son los que «sienten opinión».

Y ye que, últimamente, toi lleendo a munchos «conspicuos» collaboradores dicir eso de que la forma d’Estáu nun importa, que lo importante ye la democracia. Y ponen exemplos: hai monarquíes, como Inglaterra o Holanda, que son democracies, y hai repúbliques, como na mayoría de paises africanos, que nun lo son. Asina que da lo mesmo Monarquía que República. Claro, dicho asina, quién va a rebatilo. Toos preferimos una Monarquía parllamentaria y democrática, que una República dictatorial, pero esi nun ye’l casu. Nun tamos falando del espaciu sideral, tamos falando d’España. Tamos falando de que partimos d’una democracia como la que tenemos y que, agora, podemos planteanos si ye bono o non pal país qu’esa democracia dé un pasín más alantre, y llegue a tolos niveles políticos del Estáu, o seya, a la propia Xefatura. Entós la entruga qu’hai que facese nun ye una cosa abstráuta, xeneralista, sinón nel momentu concretu, nel equí y l’agora del nuestru país. Por supuestu que nun queremos a un Obiang, pero eso nun entra nel esamen. Queremos siguir siendo una democracia, qu’abondu trabayu nos costó consiguila, pero queremos selo hasta la fin, como otros munchos paises, la mayoría, que son repúbliques modernes y democrátiques. L’otro ye una entruga interesada y el siguir considerándonos unos menores d’edá que nun sabríemos alministrar la nuestra democracia del mou modernu qu’esixen estos tiempos. Y la comparación hai que la facer, non ente monarquía democrática y república dictatorial, sinón ente dos sistemes democráticos, nos que n’uno el Xefe del Estáu, ye un cargu que se herieda por se fíu de dalguién y llevar el so sangre, y nel otru esi cargu ye tamién decidíu pol pueblu de la forma que meyor paeza y, amás, pue ser revocáu. La otra entruga ye una trampa, y yá sabemos que la trampa, rescampla.