Va pocos díes metíame un poco, dende esta plataforma, col escritor Arturo Pérez-Reverte por una columna nel selmanariu XLSemanal. Una pequeña crítica que don Arturo nun lleería (nin falta) y que si la lleere pasaría olímpicamente d’ella. En cualquier casu, y pa que vea que nun ye por zuna, quiero recoyer y valorar el so últimu comentariu na revista, tituláu: «Esas jóvenes hijas de puta». Xeniu y figura…
Trátase del dolorosísimu tema del suiciu d’una mocina xixonesa, Carla Díaz Magnien, alumna del Colexu Santu Ánxel (de la Guarda, manda güevos) desesperada pol acosu que sofría por parte de dos compañeres y el silenciu compliz del restu del colexu. Tolos qu’agora somos adultos, fuimos primero neños y dalgo del tema conocemos. La figura del «abusón» (o «abusona») que maltrataba de pallabra, pero tamién d’obra a los que consideraben «inferiores»: el «cuatro güeyos», el silenciosu o retraíu, el marica,el gordín, en xeneral, el que yera diferente. Pero nunca como agora esi acosu cobarde llegó tan lloñe. Quiciás los nuestros compañeros nun yeren tan ayenos, o nosotros teníemos más aguante, pero lo cierto ye que nun van siendo pocos los casos como’l de la probe Carla: mozos o moces que se sienten solos, incomprendíos, inxustamente atacaos por verdaderes «bandes» de delincuentes de cuellu blancu, eses mocines esquisites, de bones families, a les que los padres nun conocen, o si conocen disculpen, y qu’empleguen tola so astucia y mala lleche pa xoder a les más débiles.
Hai munchos culpables. El primeru y mayor, les propies moces que lo executen, que yá tienen edá pa saber lo que ta
moralmente bien o mal. Eses (y esos) que’l día de mañana van ser unos adultos inmorales. Llueu, los padres que los/les parieron y maleducaron, porque lo primero qu’hai qu’esplicar a un neñu ye’l respetu polos más indefensos, y polos diferentes. Llueu los compañeros/es, corderos silenciosos que dexen facer, ensin ponese de parte de la víctima, amosa-y la so solidaridá: «son coses de neñes», pues yá vemos como terminen eses coses de neñes. Y llueu’l colexu que tien de tar pa que coses como esa nun asocedan, más nesti casu que yá teníen delles denuncies de la madre de Carla.
El xuez reconoz la culpabilidá de les dos acosadores, lo cuál nun ye poco, pero la sentencia paez un poco de risa: cuatro meses de trabayos socioeducativos. Quiero creyer que, polo menos, espulsaríenles del colexu. Too esto amuesa qu’aquella España negra, que tan bien pintaba Gila, na que se facía burlla del coxu, del sordu, del de les gafes de culu botella, del amaneráu… sigue vixente. Que la cultura ye namái un barniz baxo’l cuál ta l’egoismu, l’individualismu, la barbarie. Amás con nuevos instrumentos de posible «tortura», como son les Redes Sociales.
En fin, lo que queda de too ello ye, per una parte, una probe madre doliosa y una familia rota y, per otru, un colexu, otros padres y unos llamaos «compañeros» qu’aína echarán de la so conciencia’l socesu, pa que nun-yos manque si ye que dalguna vez lo fizo. Y lo peor de too, ye qu’esto va a volver a pasar. ¡Oxalá m’enquivoque!
