Taba seguru de que los periódicos asturianos, ya inclusive los estatales, diben a enllenase de «Cartes al Direutor» protestando escontra esi asturianu de cuentu, que dirixe la Real Academia de la Lengua Castellana y el magnu Institutu Cervantes de Idem. Idem. y qu’agora vien a dirixir, tamién, los Alcuentros de Verines (perdón, «Encuentros»). El motivu yera claru y xustificáu: un nuevu insultu a la llingua de los asturianos, sumáu a los yá munchos escaezos, desprecios, ofenses, etc. que-y llueven per tolos llaos. Pero, claro, nun ye lo mesmo que venga un babayu cualquiera a faltar, que lo faiga un altu dignatariu llingüísticu. Un reputáu intelectual que vien equí, a la nuestra casa, a falanos de «las cuatro lenguas del Estado», y de que va a volver al espíritu orixinal de los «Encuentros», separtando al asturianu, y falsiando que, dende l’aniciu, ésti formó parte de dichos alcuentros como una llingua más.
Poro, pensaba yo que, tantos nacionalistes como hai, tantos asturianistes, tantos maestros, escritores y xente civil y militar que militen na causa de la nuestra llingua, diben a saltar a la palestra a poner pingando al asturianu de cuentu y enllenando, repito, los periódicos d’una defensa firme de «lo nuestro», en materia llingüística y cultural, pa que s’entere el susodichu y el restu de la sociedá asturiana que «el Coronel sí tiene quien-y escriba». Que la llingua sí tien quien la defenda.
Nun quiero equí pecar de faltosu. Ye verdá qu’hai munches formes de defender la llingua y nun voi ser yo el que diga cuál ye la meyor. Pero tamién ye verdá que, dacuando, paez que vivimos nun «guetu» y que somos felices viviendo ehí. Que nos conformamos con falar ente nos, con facer coses que nun esceden del nuestru rueldu, como si viviéremos nun «bucle» en que lo de fuera nun importa. Pero sí importa, porque «lo de fuera» ye lo que ta torgando’l reconocimientu que la nuestra llingua merez. Dende’l reconocimientu de que l’asturianu ye «tamién» una llingua del Estáu, hasta’l de la Oficialidá. Y la xente tien que s’enterar de qu’esistimos, de que protestamos, de que nun tamos d’alcuerdu con que se nos falte y se nos marxine. Y eso hai que lo dicir na prensa, na radio y na televisión, sobre too cuando l’ataque ye tan direutu como nesti casu.
A toa esta reflexón llegué esti día cuando, como tengo fecho otres veces, diba a poneme a escribir al periódicu una carta de protesta escontra l’asturianín de cuentu. Yá tenía les primeres frases escrites cuando aparé y pensé: «Coime, si con sesenta y munchos años, y más de 38 de militancia, tengo de siguir siendo yo’l que defenda a la llingua delantre la opinión pública, ye que la cosa nun funciona». Asina que di al botonín de «salir», y cuando m’entrugó que si quería guardar el documentu, dixi que non. Yá va siendo hora de que dalguién vaiga garrando’l relevu de los «vieyos», y si nun hai quien lu garre, ye qu’esti entamu nun merez la pena. Y lo que me sobra ye tiempu pa dedicame a otra cosa.
