close
L’Ayuntamientu de Xixón desafina

L’Ayuntamientu de Xixón desafina

2017-03-11652Visitas

Cuando en xunetu de 2015 anunciábase la instalación en Xixón de la International Opera Studio dalgunos dimos un saltu d’allegría. Yera, na menos, una esperiencia pionera n’España. Una escuela pa talentos de cantu, atropaos en tol mundu y que, amás, diba a dinamizar la vida cultural xixonesa. El compromisu pola parte la IOS yera facer dos representaciones operístiques na nuestra ciudá. A cambiu, l’Ayuntamientu comprometíase a da-yos una subvención, anunciar, lloxicamente, les actividaes y facilita-yos dalgún llocal onde poder llevales a cabo.

Too paecía dir bien. L’Ayuntamientu dio-yos como ayuda económica 50.000 euros pa esi añu y facilitó-yos el Teatru Xovellanos. La IOS, pol so llau, cumplió montando, nel 2015, dos representaciones operístiques que tuvieron un gran ésitu de crítica y públicu: «El elixir de amor», de Donizetti y una guapísima «Boheme» del xenial Puccini. El que quiera, pue mirar nel buscador d’esti blogue la mio opinión sobre dambes. Al añu siguiente la IOS volvió a cumplir, montando otres dos óperes, nesti casu «La Sonnambula», de Bellini y «Un ballo in maschera» de Verdi. Por primer vez na historia, los aficionaos d’Uviéu teníen que venir a ver bona opera a Xixón.

Pero acabo enterame pol periódicu que la International Opera Studio va abandonar, nun sólo la nuestra ciudá, sinón Asturies, porque les condiciones pautaes col Ayuntamientu de Xixón nun se respeten. Baxáron-yos la subvención de los 50.000 euros del añu que se firmó’l contratu, a unos míseros 15.000, cuasi lo que se da pa facer unes fiestes de barriu. Nun sé satamente cuánto dará agora l’Ilustre Ayuntamientu a, por exemplu, la Selmana Negra, pero pal 2016 fueron 100.000 euros pa quemar nuna selmanina. Amás d’ello, la IOS quéxase de la poca difusión que se daba a los sos espectáculos, cuasi ensin anunciar nin el mesmu día la representación. Igual esos funcionarios o contrataos que lleven esi esperpentu llamáu Divertia, que nun sabe facer nin un concursu pa dirixir el FICX, nun son conscientes de la perda que supón, nun sólo palos que nos gusta la opera, sinón pa la vida cultural y social de Xixón la marcha d’esti interesantísimu proyeutu, pero dalguién debería esplicá-yoslo. Y si se ta a tiempu, intentar correxir la metedura de pata y conseguir que la IOS permaneza na nuestra ciudá. Porque, amás, nun contentos sólo con facer que se marchen, esti añu, ensin que se dea una esplicación afayadiza, tampoco nun se programen equí les dos funciones de la Opera d’Uviéu que teníen firmaes n’otros años. Nesti casu diben ser «Faust», de Gounod, y el «Rigoletto» de Verdi pero, como digo, por razones non esplicaes, suspendióse l’acuerdu.

En resumiendo: Ente esa Divertia, caxón desastrosu que lleva la cultura na nuestra ciudá, y la pasividá del Ayuntamientu que ta viéndoles pasar, quedamos ensin música operística en Xixón y, además, con visos de que nun vuelva. A nun ser dalguna d’eses compañíes perroneres que termina saliendo más cara qu’estos interesantes proyeutos. Nun se pue desafinar más.