close
Lerín y el Sporting

Lerín y el Sporting

Sporting con LerínVa unos díes, nel periódicu dixital Marca.com, Miguel Ángel Lara escribía al rodiu d’un porteru llamáu Andrés Lerín que xugó nos años 30 y 40 del sieglu pasáu, y al que pol so pasáu republicanu insultábenlu llamándolu, en dellos campos, “Rojo” y  diciendo que diben colgalu del palu del llargueru. Ye una crónica mui guapa la de Lara, acompañada de dalgunes semeyes del gran porteru. Grande pola calidá, pero tamién pol tamañu pues yera tou un “paisanón”.

Destacaba’l perodista’l pasu de Lerín por dos equipos que fueron los de la so vida. Primero el Real Zaragoza, onde empezó a xugar y col que llegó a primera, y llueu el Sporting, d’aquella Real Gijón por tar prohibíos los nomes estranxeros.

N’efeutu, Andrés Lerín fichó pol Real Gijón la temporada 1943-44 que resultó ser la del ascensu a Primera y ellí coincidió con xugadores como Tamayo, Calleja, Cervigón, el míticu estremu Cholo Dindurra, Gundemaro, etc. toos a les órdenes del “gran” Amadeo Sánchez, que tamién yera otru “paisanón”. Pero hai una anéudota inolvidable que-y tocó protagonizar -llamentablemente- a Lerín y que quedó pa siempres nel llibru de memories del Sporting. Xugaba n’El Molinón el Real Murcia, equipu qu’a la fin quedó segundu clasificáu, y nun desgraciáu choque con Lerín, el delanteru centru murcianu, Alfonso, rompió la pierna por varios sitios. Una gravísima lesión que fizo que tuvieren qu’acabar amputándo-yla. Fue’l 30 de xineru de 1944. Pocu tiempu depués, fízose-y al bravu delanteru Alfonso un homenaxe nel campu del Sporting, enfrentándose ésti con una seleición de xugadores nacionales. Cuenta Jenaro Allongo n’ “El libro del Sporting” , que Lerín se abrazó llorando a Alfonso -que venía con muletes- nuna imaxen que conmovió a tolos asistentes. Alfonso fue nomáu sociu d’Honor del Sporting y “todo Gijón intentó que olvidara el triste lance”.

Mentanto, les cellebraciones pol suañáu ascensu a Primera nun cesaben. Ya inclusive creáronse cancioneslerin 1943 conmemoratives, como un pasodoble que compunxo Amalio López, Direutor de la Banda Municipal, tituláu Alirón, ra, ra, ra. Y otra qu’improvisó’l gran actor de la Compañía Asturiana de Comedies, José Manuel Rodríguez, un día nel Robledo, y que dicía: La afición sportinguista/ da un hurra de emoción/ y hasta les oles del mar/ entonen el alirón./ Chuta lalá, chuta el balón/ chuta el Sporting y es campeón/ Amadeo, que es muy grandón/ qué bien pintaste para el Gijón. En fin que, como siempre, pa unos pintaben oros y pa otros pintaben bastos.

P.D. Los vascos ponen a Lerín nuna categoría que llamen “Porteros vascos de leyenda”. Ye pintoresco. Lerín yera navarru, y nunca nun xugó n’Euskadi. Marchó pa Zaragoza y llueu pa Xixón. Los que son “de leyenda” son ellos.