close
Les maneres y el fondu

Les maneres y el fondu

Hugo Chávez ye’l prototipu de la persona que me cae mal: Charrán, bocayón, populista, avasallador y que pretende atropar pa sí los designios de la providencia, con abondes apelaciones a Dios (sobre manera dende la so enfermedá), y los designios de Bolivar, con más abondes apelaciones a don Simón al que nun dexa descansar baxo tierra. Tamién sabemos que «coqueteó» col Golpe d’Estáu cuando, na compaña d’otros militares golpistes, intentó derrocar pola fuerza al entós presidente, Carlos Andrés Pérez, anque ésti fuere un bon páxaru de cuenta que terminó condenáu pola xusticia del so país. Chavez pasó, de la cárcel al indultu, y del indultu, recién recicláu pa la democracia, a la Presidencia de Venezuela.

Y esa ye la grandeza, y dacuando la miseria, de la democracia. Si ún tien pagaes les deudes cola sociedá y ta en condiciones de postulase pa un cargu, llueu ye la xente la que diz sí, o non. La que da y quita mandatos, encúmbrate nos más altos puestos, o mándate pa casa col rabu ente les pates. Ye verdá que nestos momentos hai un merecíu descréitu de la clas política, lo que, de dala manera, afeuta al conceutu mesmo de la democracia. Pero con eso y con too, nun la invalida como’l menos malu de los sistemes políticos, anque bien se-y puen facer abondes meyores.

Poro, ehí tenemos a don Hugo por otros seis años, engarabitáu nel puestu más altu de la nación venezolana. Porque un 55% de los sos conciudadanos, o seya una mayoría, asina lo quixo. Y nun deberíemos facelu de menos (yo polo menos nun lu faigo) quitando méritos al so trunfu. Ye verdá que puen non gustanos les sos maneres, la forma que tien de comportase en política, la utilización nel so favor del aparatu del estáu y de los medios públicos de comunicación, pero’l fechu ciertu ye que la mayoría de la población venezolana quier que siga ehí. Y quierlo, porque la realidá ye que, con tolos sos defeutos, consiguió elevar el nivel de vida de les clases más desfavorecíes de Venezuela. Los datos son imparciales, y la propia ONU reconoz que nos últimos diez años les clases populares venezolanes xubieron la so renta nun porcentaxe notable. Qu’ello fue gracies al aumentu del preciu del petróleu, seguro. Pero la cosa fue qu’eses perres canalizáronse hacia los más necesitaos, anque tamién ye verdá que d’esi mou xenerábase un cultivu de futuros votantes.

Al so contrincante, Henrique Capriles, reconoce-y el tonu conciliador y democráticu de los sos mensaxes, que rebaxo grandemente l’enfrentamientu ente los dos grandes bloques en que’l país ta dividíu. Porque imaxinar a un rival col mesmu comportamientu que Chávez, pon los pelos de punta. Capriles fue un gran perdedor, que zarró la so derrota con dos frases demoledores: «Para saber ganar hay que saber perder», y «Lo que el pueblo diga es sagrado». Tolo contrario que don Hugo que, pese a la so promesa de cambiu de modales, terminó diciendo que Capriles «había reconocido la victoria del pueblo». ¿Qué ye, que los que non lu voten a él nun son pueblu? Y ye que cambiar a estes altures ye mui difícil, sobre too cuando ún sigue calteniéndose na picalina la fola.