Nun fai falta facer un analís mui fondu de la realidá actual, pa dase cuenta de l’amestadura de dos elementos ideolóxicos que confluín nes sociedaes occidentales: el primeru sedría un neolliberalismu selvaxe que rescampla penriba de los gobiernos y (des)ordena’l campu económicu. A tal puntu, que lo que se venía considerando como un asentamiento de les democracies, depués de munchos años de dictadures (y los españoles d’eso sabemos muncho), devino nuna práutica desapaición de les mésmes. Porque, qué más da que los ciudadanos escueyan a ésti o a áquel partíu, a ésti o áquel gobiernu, si llueu esos partíos y esos gobiernos nun pinten absolutamente nada, y son otros los protagonistas de les decisiones que nos afeuten. Los organismos internacionales, les grandes internacionales financieres, los mercaos, les axencies de calificación… tienen una estructura montada na que nin los ciudadanos, nin los que debieren representalos tienen nengún poder de decisión sobre lo que-yos afeuta. Nun sólo eso, sinón que da la impresión (o dalgo más qu’una impresión), de qu’esiste una verdadera “conspiración” pa desmontar eso que se dio en nomar “l’estáu del bienestar” y los beneficios sociales algamaos con tantu sacrificiu.
Pero ye que, amás, xunto con esi estremu lliberalismu económicu al que naide ye a poner cotu, vien campando un neoconservadorismu social que pretende volvenos a les miseries y les negrures de fai cincuenta años: los intentos de vuelta atrás nel tema del albuertu, la campaña (por exemplu en Francia) escontra’l llogru del matrimoniu homosexual y la posibilidá d’adopción, la nueva/vieya actitú frente a los inmigrantes (un cargu del P.P. dixo l’otru día “que se marchen pal so país”) y otros munchos temes que tamos viendo davezu na prensa, pretenden retrotraenos a tiempos remotos (o non tanto) que camentábemos felizmente superaos.
Podría atalantase (que non aprobase) un neolliberalismu qu’alcanzare a tolos aspeutos de la vida. Ya que se manifesta no económico, que lo fuere tamién no social. O a la escontra. Pero ye que tamos sofriendo, al tiempu, lo peor de cada ideoloxía que se xunta, talo que fuere una maldición divina, p’atormentanos en vida. Y esto ta llegando ya a tal altor que nun se sabe mui bien peronde vamos a salir. Y lo peor de too ye que a mí dame la impresión (otra vez impresiones) qu’estos fenómenos nun vienen per separao, sinón que se trata de las dos cares d’un mesmu fenómeno: la involución d’unes sociedaes que pasaron de tar (más o menos) en manes de los sos ciudadanos, a unes sociedaes nes que manden les grandes multinacionales, más o menos secretes, y que pretenden volvenos a la esclavitú. Una esclavitú moderna, con tecnoloxía al nuestru algame, pero esclavitú a fin de cuentes. Nun sé, vamos tener qu’empezar a ponenos nel papel d’Espartaco.
