Nun se trata, en realidá, de los «nuestros» cuatro ases: Cuchichi, Botón, Miranda y Claverol, que pa falar d’ellos tendría de llamar a Ismael, y yo nun paso de Vicente. Refiérome a los «otros» cuatro ases: Roncalli, Woijtyla, Ratzinger y Bergoglio. Y nun los llamo los Cuatro Papas, nun vaya a pensar daquién que ye un nuevu grupu musical, como aquel de «The Papas and the Mamas», claro qu’aquellos nun yeren dafechu Papas, sinón Papás, nuna falta d’acentuación que haría feliz a Paco García Pérez , el maestru del bien escribir dende La Nueva España.
El casu ye qu’esti día, nun amagüestu novedosu na Santa Madre Católica y Apostólica Ilesia, dos Papas xuben a los altares a otros dos, como si se tratare (yá que ye un amagüestu) del cohete de les fiestes del pueblu. Nun sé si contarán con que, dientro un tiempín, otros dos Papas (igual agora vienen por pares, como la Guardia Civil) los emburríen a ellos p’arriba -pal cielu, hai qu’entender- y ellí puedan xugar un «subastao» colos sos amigos.
Nun quiero paecer faltu de respetu nun tema relixosu, más cuando a un d’ellos téngo-y simpatía y almiración, al gran
Xuanín Quiniela que, amás, si llevantara la cabeza diba a escorrer a estos otros que lu punxeron tan arriba, él que lo que primero fizo al llegar a Papa fue esaniciar la «Silla Gestatoria«. Y ye que nun ye lo mesmo ser una gran persona, nin un gran Papa, que ser un Santu. Pa ser Santu, ente otres munches coses, hai que tener reconocíu dalgún milagru: ya sabéis, eso de curar leprosos, facer andar a un coxu o falar a un mudu. O yá, en casos d’estremis mortis, que’l Sporting xuba a Primera. Igual esti últimu Papa, que dicen que ye forofu del San Lorenzo de Almagro, pue facer que gane’l campeonatu arxentinu. ¿Sería un milagru?
En fin, que me paez perbién que, depués de dos mil años, la Ilesia se remocique un poco y eso. Pero, coime, podíen principiar por otres coses menos folclóriques, como por exemplu les muyeres obispos. Ehí si que tienen campu pa novedaes, y cuasi, hasta pa milagros.
