Los sondeos daben un empate téunicu nes eleiciones griegues ente Syriza y el partíu de la derecha Nueva Democracia. Abúltame que los responsables d’esos sondeos deben tar agora na cola del paro pol güeyu que tuvieron, anque como ellos mesmos dicen qu’eso nun ye una ciencia exauta (nin inexauta) con eso cúbrense les espaldes. Vamos, que val más intentar lleer los posos del café pa saber lo que va a pasar. El casu ye que’l partíu d’Alexis Tsipras ganó por goleada al restu los partíos y a esa famosa esicisión dientro del suyu propiu que, col fachendosu nome d’Unidá Popular, preconizaba nun aceptar el rescate. Y llamo «fachendosu» al nome porque nin fue Unidá, nin Popular: quedó marxinada y fuera del Parlamentu.
Lo curioso del casu de Tsipras ye que volvió a ganar, pero esta vuelta con un mensaxe bastante alloñáu del que
llevaba la primer vez. El rescate, bien o mal (más mal que bien) yá ta enriba la mesa y agora lo que queda ye saber xestionalo de la meyor manera posible pa que la xente sufra lo menos posible. La entruga, entós, podría ser: ¿Y cómo ye que’l pueblu griegu vuelve a dar la so confianza al lider de Syriza, con un mensaxe contradictoriu col que votaron la otra vez? ¿Ye que son fatos? Lo qu’al mio modestu talantar asocede ye que la xente, el pueblu griegu, nun votó nesti casu al mensaxe sinón a la persona. Una persona que, primero, nun tuvo nada que ver cola situación que sufre anguaño Grecia, a onde la llevaron otros políticos qu’agora protesten, y segundo que pa ellos -podrán tar enquivocaos o non- Tsipras representa la dignidá del so pueblu. La dignidá frente a los grandes poderes de la Unión Europea, la Troika, el Bancu Mundial…
Cualquiera que conoza un poco la personalidá de los griegos saben que son un pueblu arguyosu y mui nacionalista. Que se bancia ente un pasáu gloriosu y un presente de probitú. Cuando entres nun restaurante o un hotel griegu ves, nos güeyos del que t’atiende y na so manera de comportase, esa mecia de necesidá de quedar bien col cliente -necesiten del turismu- pero con esa dignidá del que se sabe portador d’una cultura milenaria. Yo creo que ye esi rastru de dignidá, esi comencimientu de lo que fueron y de lo que son agora, lo que depositen en Tsipras pa que los represente, y pa que nun los pisen los mandamases de la Comunidá. O polo menos asina atalanto yo el resultáu d’estes últimes eleiciones. Pero bueno, igual nun ye por eso, vete tu a saber…
