close
LOS «INSENSATOS»… DE LOS NUESOS POLÍTICOS

LOS «INSENSATOS»… DE LOS NUESOS POLÍTICOS

2009-02-01305Visitas

Tamos en plena batalla pola financiación autonómica. Cauna de les comunidaes que compón el puzzle español, afila les sos armes (metafóriques) pa nun salir perxudicada nel repartu d’una tarta que tien mal repartu, porque dalgunos yá lleguen a él con manifiestes ventaxes. Unos porque, calteniendo unos privilexos hestóricos que los beneficien, nun se valoren como los demás, y otros porque, cuntando cola so fuerza parllamentaria y les presiones que puen facer nel Gobiernu del Estáu, quieren algamar otros privilexos que ruempen el statu quo esistente hasta agora.

Asturies ta plantexando’l tema de la financiación como’l probe de pedir que se sienta a la mesa del ricu, a ver si pue garrar dalgunes migayes. Pero nin siquiera eso sabe facelo bien. A la vista de la nula capacidá d’influyencia que tenemos nel Estáu, vamos llorar un poco pa que vean que sinón tenemos de pasalo mui mal, y la ralura con otres comunidaes va a siguir medrando. Pero ¡coime! si ye esa la táctica vamos facela bien.

El Presidente de Galicia, Sr. Touriño, sacó un as de la manga al pedir al Presidente Zapatero que se tuviere en cuenta qu’ellos son una comunidá con una llingua propia, que necesita recursos pa normalizala y espardela. Ye un gastu estraordinariu que nun tienen dalgunes otres comunidaes, poro, por qué non incluyilu dientro de les necesidaes de financiación a la hora’l repartu. Paez que l’argumentu tuvo un ciertu ecu nes files del presidente.

La nuestra comunidá tien, talo que Galicia, unes necesidaes de financiación «extras» pola mor de la normalización de la nuesa llingua. L’asturianu esiste, y ye un bien cultural en peligru de desapaición que merecería un esfuerzu inversor y llegal que lu abellugase pal futuru. Lo mesmo que nun se debería dexar cayer el Prerrománicu (y vamos camín d’ello) por parte del Estáu Español, ensin dedica-y unos recursos que complementaren lo que’l Gobiernu Asturianu pue dedica-y. El nuesu «gobiernín» ta gastando delles perres na normalización del asturianu. Seguramente non na direición correuta, y escaeciendo problemes fundamentales, como la oficialidá, pero esi gastu esiste. Y habría que lu compensar y complementar con una financiación «extra». Esi ye’l mandatu de la Unesco.

El Sr. Aréstegui, del Partíu Popular, llama «insensato» a pedir esi baremu de financiación pa la nuesa comunidá porque entós, Madrid, podría tamién pedila por tener la llingua común, o seya, el castellán. L’exemplu, ñidiamente, nun val. El castellanu ye un idioma sanu, puxante, que s’esparde cada vuelta más, y nel que se gasten munchos millones de cuenta de toos (Institutos Cervantes, etc.). Y amás, gocia d’un estatus social y políticu que lu caltién a salvo de cualesquier problema. Nada que ver con un idioma, como la propia Unesco diz, «en peligru inminente de desapaición». Ye como si nun pudiéremos da-y los recursos que necesita pa vivir un «indixente», porque’l Sr. Botín pudiere protestar.

Y en tou casu, puesto que paez que, efeutivamente, el tema de la normalización llingüística va a ser un baremu a tener en cuenta ¿por qué nun aprovechalu? Seríen unos recursos que nos vendríen mui perbién. Y, amás, ¿nun se crearía, sinón, un agraviu comparativu? Tando na mesma situación qu’otros pueblos ¿por qué tener distintu tratamientu?

Lo que nel fondu asocede ye que, los nuesos políticos, nun quieren reconocer que tenemos otra llingua al marxen de la qu’ellos reconocen. Quieren negar la so esistencia, escondela, tal y como enantes facíen dalgunes families colos familiares «deficientes», y por ello nun quieren pedir al Estáu una compensación pol so usu y normalización. Sería almitir la esistencia de les dos llingües y nun tendríen disculpa pa non igualales. Asina piensen que, d’esi mou, negando lo uno, nieguen tamién l’otro. Esto guárdase pa nós, que naide lo sepa. Yo digo qu’eso sí que ye, dafechamente, «insensato». Pero, sobre too, inmoral.

(Contactu: amtrancho@telecable.es)