close
Los nuevos mercaderos del templu

Los nuevos mercaderos del templu

Si siempre se dixo qu’esisten dos ilesies católiques: Una la oficial, la del Vaticanu y la Xerarquía, la de los ricos y los fachas. Y otra la de los probes, la del pueblu, la que representa la Teoría de la Lliberación, la que sufre coles llaceries de la humanidá; nesti momentu eses dos ilesies tán tan enfrentaes ente sí, que más parecen dos relixones distintes y distantes.

Per un llau ta la de la llamentable intervención del Papa Ratzinger n’Africa, un continente abrasáu per miseria y enfermedaes, onde apaez montáu nel so «papa-móvil» y vistíu con ropes de seda, condergando l’usu del preservativu, que podía axudar a salvar miles de vides. O la de la obscena campaña de Rouco Varela y company, sufragando con perres de tolos españoles unos cartelos maniqueos y mentirosos, emperraos nun ataque frontal contra un gobiernu, que a munchos nun nos gusta, pero que tien el respaldu democráticu de la mayoría de la población, naguando por tornar a otros tiempos, onde mandaben y ordenaben sobre vivos y muertos, col preste y el sofitu d’un dictador qu’arrasó esti país que paez que nun tien memoria.

300px-el_greco_016Al llau d’ello, esti añu cúmplense dos décades del asesinatu de los xesuítes españoles n’El Salvador: Ignacio Ellacuría, Ignacio Martín Baró, Segundo Montes, Amando López, Juan Ramón Moreno; del salvadoreñu Joaquín López y López, del ama de llaves, Julia Elba y de la so fía Celina Meredith Ramos. NUN HAI NENGÚN DETENÍU POR ELLO. De los 14 militares xulgaos por aquellos fechos, sólo dos fueron condergaos y puestos en llibertá al pocu tiempu por una llei d’amnistía. El delitu que cometieren los xesuítes asesinaos yá lu sabemos: ponese de parte del pueblu escontra la tiranía y l’arbitrariedá.

La oligarquía salvadoreña, encabezada pol so ex-presidente Alfredo Cristiani, nun perdonó a los relixosos qu’encabezaren la llucha por unes mínimes meyores sociales y salariales, que pudieren ameyorar les condiciones de vida de la xente. A lo llargo de la década de los setenta, fueron asesinaos dieciocho sacerdotes, cinco relixoses y un númberu indetermináu de cristianos laicos, lo que fizo d’El Salvador el país con más crímenes relixosos del mundu. El tamién xesuíta Jon Sobrino (na semeya) salvó la vida porque taba fuera del país.jon_sobrino

La entruga agora debiere ser: Y d’eses dos tendencies, d’eses dos posiciones enfrentaes ¿quién representa meyor, nestos momentos, a l’auténtica Ilesia Católica? ¿Quiénes son los verdaderos seguidores del mensaxe de Xesus? Si ésti tornare a la tierra ¿a qué nuevos mercaderos echaría del templu col llátigu na mano?

Ye tan clara la rempuesta que, a dalgunos de los que manden, debería cae-yos la cara de vergoña.