close
Los otros «indicadores»

Los otros «indicadores»

Los economistes suelen emplegar dalgunos índices, normalmente estadísticos, pa valorar la situación socio-económica d’un país, d’una empresa o, mesmamente, d’un individuu. Asina términos como Productu Nacional Brutu, Renta per cápita, nivel d’endeudamientu, balanza comercial, porcentaxe de paru, etc. apaecen davezu nos «medios» pa esclarianos, o intentalo polo menos, la situación de tal o cual grupu humanu o colectividá. Son los indicadores.

Llamentablemente, cuando se fala d’Asturies, tolos indicadores positivos tán a la baxa y en toos apaecemos nos últimos llugares d’esi mosaicu de comunidaes que ye España. Estos son los fechos puros y duros y, escontra eso, de nada valen los discursos grandonos nin les piles d’inciensu qu’esparramen sobre les sos cabeces los que lleven tántos años malgobernando esti país  nuestru, que ye Asturies. Vamos los últimos en cuasi too menos, seguramente, n’índices de alcoholismu, y suicidios, que paez que vamos bien colocaos.

Pero, amás d’esos, hai otros indicadores que sirven tamién pa facenos una semeya más completa de la nuesa sociedá. Otros aspeutos qu’amuesen tamién cómo tamos nun nivel de deterioru y probitú, en comparanza con delles comunidaes del entornu que nun deberíen ser superiores a nos.

balonmanoDalguna vez escribí sobre la decadencia de les señes d’identidá (les coses dafechamente «nuestres») o l’abandonu de la cultura popular, en vies de desapaición. Güei voi citar otru d’esos indicadores qu’amuesen esa probitú na que nos vemos endolcaos. Ye’l que cinca al deporte. Les carencies d’equipos de competición en tolos deportes y a tolos niveles son preocupantes. Si falamos de fútbol, tenemos  la esceición del Sporting que, depués de pasar 10 años nel «pozu» de Segunda, y tener que vender Mareo y hasta la so propia marca, agora saca la tiesta ente los equipos de primera. Pero hai que recordar qu’hebo un tiempu en qu’Asturies tenía dos equipos en Primera Divisióny tres en Segunda. Agora hai que dir hasta la 2ª B p’atopar al Uviéu. En Baloncestu, nun ye que baxáramos de categoría, ye que l’equipu desapaeció y, sinceramente, nun sé en qué categoría milita’l primeru de los equipos asturianos. En Balonmanu asocede lo mesmo. De tener equipos na División d’Honor, agora vexetamos peles categoríes rexonales, viendo como gallegos, vascos y nun digamos catalanes y madrilanos, atropen miles de persones nos sos palacios de deportes. Por ciertu, esti fin de selmana hebo cinco xugadores asturianos, que ‘claro! militen n’equipos de fuera, convocaos a les distintes seleiciones nacionales. En ciclismu, tamién los vascos y los gallegos tienen los sos propios equipos y equí lo que facemos ye proporciona-yos los nuestros meyores ciclistes pa nutrir les sos files, y hasta pa facelos cabezaleros, como pasa col bonu de Samuel Sánchez, lider del… Euskatel Euskadi. Lo mesmo en Voleibol, que llegó a tener dos equipos en Divisón d’Honor. Y… pa qué siguir.

Ye cierto que la situación económica ye mala, pero n’otros llaos siempre hai dalgún empresariu, públicu o priváu, qu’arrima’l llombu y pon perres pa dalgo que nun sirve solo como aliendu, sinón como espeyu nel que puean mirase los nuesos neños y neñes, y los mozos y moces tengan un aliciente pa salir de los chigres o del «botellón». Y ye qu’hai que trabayar nel deporte base, pero’l deporte de competición ye’l que tira de los rapazos como imitación de los sos grandes o pequeños exemplos. Equí nun hai empresarios qu’inviertan un duru nel nuestru deporte de competición, pero sí lo fain fuera, como por exemplu la empresa ALSA, que siempre ta presumiendo de la so «asturianidá» y dan-y premios al Sr. Cosmen Adelaida, y llueu ta financiando al ADEMAR de Lleón. O la Caxa d’Aforros d’Asturies que nunca nun apostó, como otres caxes del estáu, por esti tipu d’axudes.

Sólo hai un equipu asturianu, xixonés pa más señes, que ye ná menos que Campeón d’Europa. Pero naide lu conoz ¿A que non? Agora, eso sí, ¡vaya bonu que ye esi Fernando Alonso! ¡Somos los meyores! País…