VINCENTE MINELLI.- Nietu d’inmigrantes italianos y fíu de xente de «la farándula» (so pá tenía un teatrín ambulante col que percorría tol país), esti famosu Vincente foi l’autor d’una riestra d’escelentes películes y «reinó», a lo llargo unos cuantos años, nel inevitable «Hollywood».
Cuando yo yera neñu, esfrutaba abondo colos musicales de Minelli, enllenos de coloríu y con perguapos númberos y allegres canciones. Y asina como los musicales nos que salía Fred Astair que, amás, yeren en blanco y negro, paecíenme «acartonaos» y ayenos, con aquellos smokings y aquelles tarabiques tan demodés, los del mio Vincente yeren modernos y vitalistes, y los personaxes paecíen sacaos de tipos populares enxertaos na realidá, pudiendo dicise que fue’l renovador del xéneru.
Quiciás «Un americanu en París», con un París «de cuentu» recreáu nos estudios de la Metro, y «Gigi», con una 
guapísima Leslie Caron, pudieren ser les más emblemátiques de los sos películes musicales. Pero ye que Minelli fizo muncho más que musicales, hai una riestra de perbones películes que lleven la so robla. «Cautivos del mal», con Kirk Douglas y dos de les dames más interesantes de Hollywood: Lana Turner (estraordinaria «mala» en Los tres mosqueteros) y Gloria Graham (siempre misteriosa femme fatal del cine negro); El padre la novia, colos maraviosos Spencer Tracy y Elizabeth Taylor, una comedia que nun avieya; «Como un torrente», cola guapísima Shirley MacLane nun «papelón» dramatiquísimu; «Con el llegó l’escándalu», y «El llocu del pelo roxo», biografía de cultu d’otru de los mios Vicentes: Van Gogh, ente otres munches películes.
Casáu con Judy Garland, fue’l padre de Lizza Minelli, recordada mocina de la recordada «Cabaret» llueu, al mio xuiciu, abondo desaprovechada. Trabayó, a lo llargo de la so carrera, colos meyores actores y actrices del momentu, destacando, precisamente, pola gran manera de dirixilos que tenía. Por too ello, y porque me fizo mui feliz en munchos momentos de la mio vida, quiero recordalu equí ente los mios Vicentes favoritos. Morrió, Vincente Minelli, nel añu 1986 a la edá de 83 años. Pero cuando quiero recordalu, nun tengo más que poner una de les sos películes. Siguen faciéndome antroxar.
