Tuvi a puntu de gastar una chancia a los avezaos llectores d’esti blogue. Yera poner, ensin dicilo, el mesmu comentariu que fici l’añu pasáu na entrega de los Premios de la «Fundación Príncipe de Asturias», cola seguranza de que nengún diba a dase cuenta del cambiazu. Porque, añu tres añu, repítese la mesma cantinela col únicu cambiu de que si el «principín» lleva o non barba, o la «principina» camudó dalguna otra parte del so cuerpu con cargu al so bolsu o a la Seguridá Social. Paez que col cambiu de la nariz, agora respira meyor. Nosotros non.
Pero nun fici’l tracamundiu porque esti añu hubo dalgunos factores nuevos. Non nel interior del Teatru Campoamor, onde, como dicía Xulio Iglesies, «la vida sigue igual», anque ye verdá que se tresmuten dalgunos rostros: los premiaos, claro. Y Fernández por Areces. Y dalguna otra personalidá menor nel patiu butaques. Pero eso nun fai muezca na «escenografía» xeneral del actu. Los factores nuevos son, más bien, afuera. Y ye que d’aquel públicu entusiasta que, va unos años, aplaudía «fervorosamente» a principinos y autoridaes, pasóse a un publicu más desagradable, que protesta pola situación del país y la suya particular. Ya inclusive que s’atreve a llamar a los asistentes con una guapísima pallabra asturiana, mui definitoria: «FARTONES». Un públicu, esti de fuera que, como diría Wenceslao Fernández Flórez, nun yera de «praliné».
Y ye qu’ente l’interior del Teatru Campoamor, y l’esterior del mesmu, hai un muriu que ríome yo del de Berlín. Dientro, hai un mundu falsu, d’opereta, onde la xente se disfraza pa sentir un discursu retóricu, onde nada suena nin a nuevo, nin a vivo. Onde se cita a una crisis que nun se siente, a unos premiaos que nun se lleeron, a unes Cortes de Cádiz qu’un Borbón esanició de cuayu. A una exemplaridá imposible cuando, por exemplo, los premiaos na categoría de Deportes lleguen nun avión priváu, y marchen del mesmu mou, con un gastu poco «exemplar» nos tiempos que cuerren.
Mentanto, nel esterior, al otro llau del muriu, ta’l mundu daveres. El de los conflictos sociales, el de los 105.900 paraos
n’esti País que nun paez interesa-y muncho al so príncipe, el de los deshaucios o los recortes económicos y sociales. Y ye que, nesta ocasión, falló’l decoráu. Nun pudieron poner unos «extras» aplaudiendo, como nos programes de la «tele» cuando se prende la lluz roxa de «aplaudir». Y muncho me temo que, cada añu que se repita’l tópicu de los Premios, los «extras» vaigan aumentando y vaigan asoleyando muncha mayor «mala lleche». Van tener que poner les valles un poco más lloñe, allá pol Narancu.
Lo que sí podría copiar del añu pasáu ye la «vacuidá» del discursu principescu, enllenu de grandes frases masuñaes que nun valen pa nada: «la unidad frente a tiempos difíciles», «dar lo mejor de cada uno», «mirar el futuro con esperanza», «encauzar y dar respuesta a los graves problemas que vivimos»… Nun te fadia, ¿y eso cómo se fai? En fin, tampoco nun quiero afondar nel tema, que yá lo fici n’otres ocasiones. Y, claro, nin una sola pallabra na llingua del so Principáu. Nin una sola cita de dalguna personalidá asturiana, nin d’un poeta asturianu, nin d’un refrán del País. Creo que citó a Goethe, pero nun me suena como de la Pola. Esi «bañu d’asturianía» déxalu pa consumu internu, cuando ya nun nos vean los de fuera. Ye igual, la parte de la xente que taba «al otru llau del muriu», dientro del decoráu, aplaudió puesta en pie cuando prendieron la lluz roxa. Qué pena que la vida, la vida real, tuviera del otru llau de la puerta del teatru.
