Esi yera’l títulu d’una simpática película de Berlanga qu’encartia mui bien pa desplicar lo que pasó esti domingu: El Sporting ta en Primera. Nun voi dicir la carambola que tenía de pasar pa qu’esto asocediere, porque tolos xixoneses sábenlo. El casu ye qu’esa carambola dióse. Y nun ye que nel fútbol nun se dean los milagros, claro que sí, esi ye un de los sos alicientes, pero tampoco nun ye que pasen tolos díes. Abasta con mirar les clasificaciones al final de temporada pa dase cuenta de que los equipos con más presupuestu, con más perres, ocupen los primeros llugares. Y amás cada añu con mayor claridá porque la diferencia ente ricos y probes, como pasa na propia vida, ye cada vuelta mayor. Quién pue competir con esos Real Madrid y Barcelona, cargaos hasta los tacos de millones y que saquen cuasi venti puntos a los sos perseguidores. Eso enantes nun pasaba y había equipos más modestos que podíen aspirar a ganar una Lliga o una Copa. Si hasta el propiu Sporting tuvo a puntu de ganar una Lliga -quedó segundu y con sospechoses actuaciones arbitrales- y dos Copes d’España (o como se llamaren entós).
Asina pues quedamos en qu’hubo milagru, porque esti añu el Sporting tenía un baxu presupuestu, un equipu fechu a base los rapazos de la cantera y cola edá media más baxa de la categoría. Y la lleición que nos dieron ye que nunca hai que rendise y que mientres hai vida hai esperanza, tópicos perconocíos pero que munches veces escaecemos abellugándonos nes crítiques o nes disculpes. Dicía un teólogu mui famosu, el sacerdote francés Louis Évely, al que por cierto terminaron echando de cura, que: «hai que creyer, como si too dependiere de Dios, y trabayar como si too dependiere de nosotros». En castellán hai un refrán que lo diz muncho más cenciellamente: «A Dios rogando, y con el mazu dando». El Sporting tuvo esa fé, laica, que ye tan necesaria pa luchar por una idea, y al tiempu dio-y al mazu fuertemente, domingu tres domingu, hasta algamar esi suañu que paecía imposible. Porque siempre fuimos de Primera, pero agora Tamos en Primera. Y nun entró en más detalles porque va unos pocos díes yá m’espurrí nel tema, a la espera del resultáu final. Ésti yá llegó. Norabona a toos.
