Quiciás fue lo inesperao de la noticia, nun sabía que tuviere malín, pero causóme una fonda esmolición el fallecimientu del buen escritor y buena persona que fue Luis Arias Argüelles-Meres. Republicanu convencíu, profesor, ensayista y escritor, va a dexar una afitada buelga na vida social y lliteraria asturiana. Yera fíu deManuel Antonio Arias García, maestru de cuando la II República y, embaxo’l nomatu de «Antón de la Braña», estudiosu del nuestru folklore y autor teatral. Luis yera, amás, un gran conversador y sabíalo too de personaxes como don Manuel Azaña, un de los sos favoritos.
Va unos años, l’Academia dedicó un de los sos díes de les Lletres a la participación d’una representación de lo que se da en llamar «la sociedá civil». Ellí tuvo’l buenu de Luis Arias que dixo unes emotives pallabres que, a la fin, yo-y agradecí na entrada del Campoamor. «Gracies a vosotros, pol llabor de toos estos años», contestóme, y paezme que fue la única vegada que falé con él personalmente. Sí munches otres a traviés de «los medios». Home cultu, intelixente, dialogante cuando correspondía pero firme nes sos convicciones, supón una gran perdá pa esa Asturies qu’él tanto quixo. Como so padre. Que la tierra-y sea leve.
Semeya: El Comercio
