Morrió un de los grandes del «reporterismu» periodísticu. Un paisanu que tuvo nes principales guerres contemporánies, incluyida la «mítica» del Vietnam, pero que, pese a los horrores que vio y que cuntó cola so prosa diréuta y cenciella, nun-y llevó a perder la fe nel xéneru humanu. Manu Leguineche continuó siendo un home «de pueblu», cercanu, que cumplía esi tópicu -que me fiede bastante- de ser «amigu de los sos amigos». Polo menos ye lo qu’ellos dicen.
Pero ye que Manu, amás, yera una persona ilustrada. Estudiare Derechu en Deusto, Filosofía y Lletres en Valladolid, Filosofía italiana en Madrid y Lliteratura francesa en Toulouse. Too ello-y daba un «barniz» humanísticu que siempre caltuvo, inclusive nes más dramátiques situaciones.
Tengo delantre un de los sos llibros: «Los años de la infamia», una crónica de la II Guerra Mundial que yá lleí va tiempu. El títulu que Manu-y punxo, fai referencia a la fras del presidente norteamericanu Roosevelt que dixo, cuando’l bombardéu xaponés de Pearl Harbor, qu’aquello fuere «el día de la infamia». El periodista enanchó la infamia a los 2.191 díes que duró la guerra. El llibru de Leguineche ye una crónica apresurada d’esa guerra, pero nun ye’l llibru d’un historiador. Precisamente toi lleendo agora «La segunda Guerra Mundial», del historiador inglés Antony Beevor (autor tamién de» La Guerra Civil española»), un «tochu» de más de mil páxines, con semeyes, nes que se cunta tol procesu políticu y militar que supunxo esa dómina terrible. Nomes, feches, batalles, diplomacia… El llibru de Manu fala dalgo d’esto mui resumidamente pero, a cambiu, introduz un detalle que los historiadores nun suelen tener: el componente moral. El comportamientu éticu. L’autor vascu nun sólo cunta, tamién xulga y fá-ylo cola dureza que-y d’a el so compromisu personal. Por ello, como suel pasar en toles guerres, naide se salva del too porque, anque unos son más responsables qu’otros, en definitiva toos son culpables. Versalles ta nel orixe de tolo que vieno depués, anque la responsabilidá de los nazis ta fuera de toa discusión.
Sería mui llargo entrar a valorar otra parte de la obra de Leguineche y, amás, yá tán faciéndolo los medios de comunicación y los sos amigos. Yo quédome cola imaxe d’esti home cultu, valiente, ponderáu que fue exemplu de comportamientu nunos tiempos escaecíos de tou exemplu. Unos tiempos duros, difíciles, nos que namás los grandes, como lo fue elli, van pasar a la Historia. Esa qu’él tan bien supo interpretanos.
