close
Marcha Fernández: acabáronse los problemes…

Marcha Fernández: acabáronse los problemes…

Real_Sporting_de_Gijon.svgMisión cumplida: Por fin marcha l’odiáu y vituperáu Fernández, culpable de tolos males qu’aquexen al fútbol en xeneral y al Sporting en particular, y a cambiu vien… nun sabemos quién. Otru cualquiera, da igual. El casu yera echar al culpable, al chupón… Agora yá nun farán falta les manifestaciones escontra’l másimu accionista y los sos «adláteres» (que dícía José María García), nin sacar pancartes en cualquier campu d’España en que xugare’l Sporting metiéndose con elli, nin habrá que ponese d’alcuerdu pa glayar a la so escontra nel minutu 5 de cada partíu. Marcha Fernández: el problema ta solucionáu.

Lo primero qu’hai que dicir de la marcha de José Fernández ye que, en venti años que tuvo nel Sporting nunca metió nel bolsu una sola perra. A la escontra, lo único que fizo fue sacar del so bolsu y ponelo pal Sporting: lo primero comprando acciones cuando l’equipu taba a piques de baxar a Tercera si nun se cubría’l Capital Mínimu. Y llueu, pagos en metálico cuando fizo falta, y avales cuando la cosa lo requería. Y agora que marcha (o que lu echen), namás va a cobrar el valor nominal de les acciones (ye dicir, lo que costaron nel so día nel mercáu, y lo que la entidá-y debiere d’otros pagos. Si cuntamos les devaluaciones, ta claro que perdió perres. Perres, tiempu y salú porque en cualquier otru negociu que metiere’l dineru sacare, de xuro, mayor rentabilidá, anque fuere a plazu fixu nun bancu. ¿Quier esto dicir que Fernández yera un santu y que lo fizo too bien? Nin muncho menos. Fernández fue un home que quixo al Sporting, pero tamién buscó lo  que tolos que tienen perres necesiten: notoriedá. Porque ¿qué más da que tengas dineru si socialmente nun pintes nada? Eso ye lo que puxa a munchos ricos o medio-ricos a presidir estremaes instituciones sociales, ente elles les mui notories del fútbol… amás del amor a los colores, claro.

Lo peor que fizo Fernández, al mio modestu talantar, fue la época en que decidió ser, amás de másimu accionista, Presidente del Sporting, cargu pal que nidiamente nun taba capacitáu. Ehí fue un «panchín» nun mundu de tiburones y toos lu engañaron: los «güeyadores», esos supuestos «ojeadores» que dan informes sobre futbolistes, los intermediarios que s’aprovecharon de la so ignorancia futbolística pa cobrar les sos comisiones, y el restu la Xunta Direutiva que compartió aquel tiempu con elli. Un tiempu en que se tiraron le perres fichando a una partida d’inútiles que nun valíen nin lo que costaba la camiseta roxiblanca. Con dicir que munchos d’ellos ficháronlos mirando un vidiu… Asina que, en viendo la so nula capacidá pa dirixir un club de fútbol, Fernández volvió al so papel de «paganini» y ellí se quedó dexando qu’otros, supuestamente bonos xestores, llevaren les riendes del Club.

Y el Sporting quedó a mercé de les foles futbolístiques, nes que los equipos probes cada vuelta endéudense más (Seguridá Social, Fiches, Sueldos,SPORTING DIA D 32.jpg Facienda…) y los recursos xeneraos nun llega pa cubrir eses deudes. ¿Ye una mala xestión? Quiciás. La solución pasaría por nun fichar xugadores, nin alquirir nuevos gastos, y vender a los que salieren bonos. El problema ye que, esos  aficionaos que glayen escontra «los Fernández». lo que quieren ye que’l so equipu xuegue bien, gane y xuba a  onde los grandes, y pa eso necesítense perres. ¿Dalgún de los que glayen piensa poner un duru? N’home non, que los  ponga Fernández. Asina que, quitando a los «cuatro grandes», que ganen munches perres colos partíos televisaos (qu’agora son toos de pagu), los derechos d’imaxen y los pelotazos urbanísticos, el restu tán toos «cagando la fame». Esti añu tán arriba l’Almería, el Granada, l’Eibar, l’Elche…. ¿Solucionaron yá los sos problemes? Almito  apuestes: volverán  pa Segunda más ceo  que tarde y principiarán de nuevo los problemes y les deudes. El fútbol, repito, nun ye rentable más que pa cuatro.

Paez qu’agora va a comprar al Sporting un grupu inglés. Un grupu que dicen que ye, en realidá, una empresa de Capital Riesgu. Ya sabes, vienen equí porque dende siempre quixeron al Sporting y van a axudalu por amor. Les regles de mercáu queden fuera. Asina que veremos lo que nos trai’l futuru. De momentu echamos a un de La Calzada y trayemos a unos ingleses. Dexaremos la sidra a un llau y brindaremos con whisky. ´Salú, marchó’l culpable…!