Yera d’esos amigos que se fain nel colexu de los que, a la llarga, quédate namás l’alcordanza d’aquellos tiempos. Que más qu’amigos son compañeros de clas. Antolín, «el Antolio», como lu llamábemos los de la pandilla, fue un de los que más recuerdu me dexó porque teníalo too: yera llistu y avispáu (que nun ye lo mesmo), simpáticu y «discutión». Ensin ser nunca nengún «lider», destacaba n’aquella promoción del Corazón de María de los años 1959-60 pese a que nun yera mui deportista. De fechu, nun xugaba en nengún de los dos equipos en que nos dividíemos los de Preu a la hora’l recréu: El River y el Palmeiras. Lo d’él yera otra cosa. Xunto con José Avello Flórez, que llueu fue un destacáu escritor de teatru, yeren los más intelectuales del cursu y los abanderaos de les crítiques a los cures que dirixíen el cotarru. Avello, como yera internu, nun podía escedese neses crítiques pa nun tener represalies, pero Antolín nun tenía esi problema. Asina que al Padre Echegaray (el Pato), al Jaurrieta y al Antón (el Bolas), los acribillábemos porque d’aquella yá yéremos mayores y la tiranía (sele, hai que dicilo) ya principiaba a afloxar.
Cuando pasaron los años escolares afloxáronse tamién los contautos, que paecíen eternos, colos compañeros y caún emprendió caminos estremaos y, en munchos casos, alloñaos. Poques veces más fui a ver al Antolio, anque bien ye verdá que siguí de cerca la so carrera lliteraria. Con non mui bona fortuna pola mio parte, porque de les dos primeres noveles qu’escribió nun m’enteré de nada. Culpa mía, seguro. Pero yeren demasiao esperimentales pal mio gustu. Meyor suerte tuvi coles tornes, que-y dieron munches satisfaiciones y unos cuantos premios.
Enteréme esti día del so fallecimientu y sentilo como cuando se pierde a dalguién mui queríu, anque faiga milenta años que nun lu trates, y ye que los amigos de la xuventú calén siempre mui fondo naquellos corales tovía tiernos. Que descanse en paz el compañeru d’estudios de los años mozos.
P.D. Na vieya foto que tenía nun caxón, Antolín ye’l de la derecha y yo el de la izquierda. Nengún simbolismu políticu, claro.
