Va unos meses, aprovechando’l 30 cabudañu de la muerte del maestro Rafael de León, falaba yo de la Copla que, de mano de mio güela materna, pasó a formar parte de la mio educación sentimental. Un xéneru, dicía, que cuntó col fervor de munchos intelectuales del altor de los hermanos Machado, León Felipe o García Lorca, y que yo sintía cantar, de la mano d’Anxelita cuan nun yera más qu’un «retacu». Pues bien, si Rafael de León fue’l maestru de los lletristes copleros, Marifé de Triana lo fue de les que poníen la voz.
Entérome güei de la so muerte nun hospital de Benalmádena, a los 76 años d’edá, anque como se diz un poco «sensibleramente» nestos casos, sigue tando viva nes sos canciones. Nun soi nengún espertu nesi arte que, inxustamente, llevó la etiqueta de «franquista», cuando la Copla siempre fue un xéneru rompedor, canalla, sensual y pecaminosu, enllenu, como’l tango, de muyeres de la vida, chulos, querides y canalles, qu’abeyaben por aquellos baxos fondos de les ciudaes españoles. Pero anque nun soi nengún espertu, sí tengo una bona «discoteca del oyente» enllena de coples y copleros. Dos son les que más me gusten: Concha Piquer y Marifé de Triana. De la primera, préstenme les canciones tipu «Romance» o «Tonadilla», un migayín más lentes y cadencioses. De la segunda… bono de la segunda préstame too porque yera insuperable, pero onde meyor daba la talla yera nes dramátiques, nes tráxiques, les que vienen embaxo l’estil o modalidá de «Zambra». De doña Concha destacaría, por exemplu, la maraviosa «Mañana sale» , o «Tatuaje», o las «Cinco farolas»- De Marifé… tendría pa facer un Master. Por dicir dalguna pondría esa guapura que ye «La loba», que nun sólo cantaba, sinón qu’interpretaba; o la que-y dio nome al espectáculu que llevó per toa España, que yera «Torre de arena», y otres como «En una esquina cualquiera», «Alondra del cielo»… En fin, un ensin parar.
Hai un programa nel «Canal Andalucía», qu’echen los sábados, que tien xustamente esi nome: «Se llama Copla». Anque salen d’ellí bones voces, dexé de velu porque ca día se paez más a los programes de maruxeos o de seudo-polémiques de famosinos. En cualquier casu, van tener que pasar munchos años pa que salga (si sal) otra cantante, en tola estensión de la pallabra, como Marifé de Triana. Una de les más grandes. Siguiré sintiéndola nos díes que me toca planchar en casa, y asina nun la echaré tanto de menos. Descanse en paz.
