Diz el Rei (o la Casa Real, que pal casu ye lo mesmo) que nun hubo nenguna improvisación nesto de l’abdicación. Que lo tenía decidío yá dende va unos meses y que lo sabíen les persones que tenién que sabelo. Si eso ye asina, nun sé a quién-y lo diría’l monarca, si al peluqueru, al tenderu de la esquina o al repartidor que lleva les pizzes a la Zarzuela, porque los que daveres tendríen que lo saber andaben a uves. Si non, cómo se come eso de qu’haya qu’improvisar, de priesa y corriendo, una llei pa que la decisión real pudiere cumplise. Una llei na que nun se sabía qué poner y cómo votar. Porque si se vota que Non a la llei pa l’abdicación del Rei ¿quier dicise que non lu dexamos dimitir y queremos que siga él? Ye too ello un despropósitu. ¿Qué munchos queríen la República? Yá, pero eso nun se xugaba nesta votación.
Otra chapuza más: esi cuentu de “l’aforamientu” monárquicu. Resulta que-yos paez agora que’l Rei queda n’indefensión xurídica, porque entaínen a “aforalu” que pierden el culo. ¿A qué tienen mieu? ¿Tantos delitos cometió? Y en tou casu, ¿nun dixo’l mesmu Juancar que “la ley es igual para todos”? Eso sentilo yo con estes oreyines que se va a llevar la povisa. En cuantes al cada vez más patéticu Gallardón, diciendo que l’aforamientu nun ye un privilexu, val más nun comentalo. En memoria de mio suegra Florina que siempre quería votalu y nunca podía.
Polo demás, los qu’anden tol día ocupando la prensa son los “constitucionalistes”, esos expertos en Drechu 
Constitucional que nos aburren falándonos de cómo tán les lleis y lo qu’habría que facer pa esto o pa l’otro y pa un Referendum, y pa lo demás alló. Una enquivocación total. Si de verdá lo que se quier ye escoyer ente Monarquía y República los que tienen que falar son los historiadores, porque na Historia ta la clave de too. Lo qu’importa ye’l migoyu del tema, el conteníu, lo que siempre representó una cosa y otra. Les arbitriaridaes, les traiciones, los privilexos, los desprecios al pueblu per parte les monarquíes. Que nos digan, sobre too, quiénes fueron los Borbones y lo que ficieron, y cómo España pudo ser otra cosa estremada de lo que fue –pa meyor, claro- por culpa d’ellos. Porque, en definitiva, los constitucionalistes son namás los “mecánicos” del taller. Los que dicen cómo hai que poner los tornillos pa que les ruedes caminen. Pero los que conocen daveres el camín, el que llevamos percorríu y el que nos queda por percorrer, son los que conocen la Historia. A esos son los que tien d’escuchar el pueblu soberanu y non a los del “cotón”, porque si una cosa quier cambiase dafechu, siempres hai un mou de facelo.