Hai una denuncia pergrave, asoleyada pola organización Amnistía Internacional va un tiempu y que, ensin embargu, nun vi yo que tuviere nenguna repercusión pública. Nin por parte de la clas política, encerriscada nos casos de corrupción que se multipliquen, y dedicándose a despelleyase, en llugar de gobernar. Nin de la xudicial, enfotada en casos y coses pintoresques, por llamalo de dalguna manera, como la persecución «a muerte» de Garzón o la «patagüeyada» del xuez Carbayu na sentencia del tema del asturianu. Y cuasi m’atrevería a dicir, que tampoco la propia sociedá, apigazada ante tanta desvergoña, ye a enxuiciar un asuntu tan grave que merecería primeres páxines nos periódicos, si estos nun ficieren de «caxa de resonancia» de partíos o grupos de presión.
Si yo, por exemplu, atara al mio fíu a una siella con cinta d’empaquetar, si-y diere medicación ensin dici-y pa qué ye, si lu tuviere aisláu a lo llargo de dellos díes nun cuartu, si nun informare a naide de lo qu’asocede… el fiscal o la autoridá xudicial, quitaríamelu y fadría lo correutu. Pues bien, eso ye lo que fai l’Alministración nos Centros de Proteición Terapéuticos pa menores.
Amnistía Internacional fexo una investigación sobro la situación de los menores internaos en tres comunidaes autónomes, Andalucía, Cataluña y Madrid, qu’atropen el 55 por cientu de los centros qu’hai n’España y denunciaron estes mesmes coses que yo cuento. L’estáu d’estos menores ye perpreocupante, yá que resulten invisibles dafechu. Nun se sabe cuántos ingresen nestos centros, nin siquier cuántos centros esisten. Una invisibilidá que los fai dafechamente indefensos, pues la mayoría de los abusos que se faen escontra los sos drechos humanos queden ensin castigu. Tampoco nun se realicen investigaciones imparciales ya independientes al rodiu de la so situación.
La organización A.I. tien recibíes denuncies de violaciones de la intimidá, humildaciones, rexímenes disciplinarios que van a la escontra de les normes y trataos internacionales, castigos corporales, aislamientu forzáu, contenciones físiques y farmacolóxiques (ataos y silenciaos nuna siella o amarraos a una cama), too ello, claro, ensin supervisión xudicial, namás suxeto al criteriu del personal del centru. Práutiques totalmente prohibíes nos trataos internacionales roblaos y ratificaos por España.
Hai que pidir, pues, al Gobiernu Español qu’entame una investigación urxente sobro los abusos y violaciones de los drechos humanos escontra los menores abellugaos nestos centros de proteición terapéuticos. Qu’ellabore, xunto colos gobiernos de les comunidaes autónomes, un protocolu pa cuantificar, controlar y vixilar toos estos centros, según les pautes internacionales. Y que too ello pueda y deba ser supervisao por un xuez. Hai que finar, d’una vez por toes, con unes práutiques que cuestionen a un estáu que se pretende llibre, modernu y democráticu.
