Morrió Ricardo, ente’l desconocimientu por un llau y la indiferencia por otru. Namás xugó un añu nel Sporting, la temporada 1956-57, pero a lo llargo de munchu tiempu dexó un güelga pergrande nos que yéremos aficionaos del equipu. Creo que ye nos Evanxelios onde se diz aquello de «poles sos obres los conoceréis» y eso mesmo podemos aplicá-ylo a Ricardo Alós y a les sos cifres nel añu que tuvimos la suerte de velu xugar n’El Molinón. Y fuera d’él, pues esi añu fue de los pocos que me desplacé al Buenavista (que llamentablemente perdió va tiempu esi guapu nome pa dar cultu a un paisanu que yá naide recuerda quién fue), n’un de los primeros partidos de la temporada. Y ellí ya Ricardo metió un de los goles d’aquel 1-2 a favor del nuestru equipu.
Pero díbemos coles «obres» poles que lu conocemos. Esi fue’l añu del ascensu a Primera División con don Jesús Barrio y aquella delantera formada por Sánchez, Biempica, Ortiz, Ricardo y Armengol marcó nada menos que 107 goles. Cifra record na historia del equipu, y d’ellos l’amigu Ricardo metió la chifladura de 46 que tovía hoi ye la marca másima en Segunda División. Naide fue a superalu depués de tantos años. Tamién tien el record de 6 goles nun partíu, que fue escontra’l Lérida (con esi nome) al que se derrotó n’El Molinón por 11-0. Otra marca que quedó ehí pa la historia del Sporting.
Ricardo xugó sólo una temporada porque venía cedíu pol Valencia y, claro, l’añu siguiente nos lu llevaron con toles de la llei. Muncho lu lloramos. Pero fue ésti un futbolista efímeru. L’añu siguiente col Valencia quedó másimu goliador de Primera División, empatáu con Di Stefano y Badenes (del Valladolid, que llueu fichó pol Sporting), pero depués… nada. Una nada absoluta. Cósmica. Xugó dalgún añu más col Valencia, malpenes marcando un gol qu’otru, pasó per otros equipos, ensin pena nin gloria, y esapaeció del firmamentu futbolísticu ensin dexar más nicios. Tou un misteriu. Como si lu hubieren agüeyao.
En fin, agora que lleo na prensa qu’acaba morrer, recuerdo aquel añu máxicu en que tolos rapazos queríemos paecenos a Ricardo hasta na forma en que caminaba pela cai, un poco «patizambu». Y asina nunca Xixón tuvo tantos neños «patizambos» como esi añu. Como si fuere un andaz. Yo taba ente ellos, anque yera imposible imitalu. Que descanse en paz aquel delanteru maraviosu que tanto me fizo esfrutar nunos años en que, el fútbol, yera la mio mayor pasión. Igual nunca hubo otra mayor…
