Esi paisanu honráu que fue Julio Anguita (al marxe d’ideoloxíes o carauteres) definió al llamáu Rei eméritu diciendo d’él que yera “un pícaro”. Eso fue enantes de tou esti xaréu cola saga/fuga de Juan Carlos I a Abu Dabi. Como persona intelixente que fue (Anguita, non el Rei) igual agora camudaba la pallabra por otra un poco más fuerte. Seguro que sí.
Dixéronse yá tantes coses en tan pocu tiempu que nun queda muncho por amestar al tema. Pero dalgo habrá que dicir porque ye cuasi obligao. La mio opinión yá quedó llantada n’otros llugares d’esti blogue: los Borbones fueron una calamidá pa España. Dende los alloquecíos Felipe V y Fernando VI, pasando pol porcaz Rei “felón”, el sinvergüenza de Fernando VII, hasta’l güelu del “pícaro” –Alfonso XIII- qu’alendó al so amigu, el Xeneral Fernández Silvestre, a la campaña del Rif (onde tenía intereses mineros), plasmando nun telegrama aquel soez “¡Ole tus cojones!” cuando anició la marcha de Melilla a Alhucemas. Yá sabemos cómo aseló: col famosu “Desastre d’Annual” onde morrieron más de 11.000 soldaos españoles a manes d’Abd-del-Krim. Un d’ellos, por suerte, l’amiguín del Rei que paez que se pegó un tiru. Paso per alto les poques lluces de Carlos IV yá Isabel II que, anque causaron abondos males, vamos pensar que nun fuere a posta.
Esti “pícaro” d’agora fue curiáu y educáu dientro la dictadura de Franco pa ser el socesor. Un socesor títere, porque lo que quería’l dictador yera la perdurabilidá del réxime por él impuestu, llogru imposible porque nun podía haber un franquismu ensin Franco, como la Historia amosó. Ente unos y otros amagostaron la transición ensin que’l pueblu español pudiere pronunciase sobre la forma de gobiernu a siguir: Monarquía o República, y metiéronlu dientro del “totum revolutum” d’una Constitución que tenía que salir, sí o sí, porque la otra opción yera tornar al franquismu. Asina nos lu colaron. Llueu quixeron ponelu de salvador de la democracia en peligru, un peligru que nun ta claro qu’él mesmu fabricare, xugando a los soldadinos col so tutor el Xeneral Armada. Hai muncha bibliografía sobre’l tema, mesmamente “Anatomía de un instante” de Javier Cercas. La cosa salió como salió col ridículu de Tejero y aquello, que pudo ser un bañu de sangre, quedó nun afianzamientu de la democracia.
Paez que Sabino Fernández Campo lu atemperó lo que pudo demientres fue secretariu y llueu xefe de la Casa Real. Polo menos fue a tapecer los “negocios” de tou tipu que se-y achaquen… hasta onde llegó. Pero yá dende va unos años volvió a apaecer la dupla que siempre calterizó a los Borbones: la coldicia y la entrepierna. Y asina llegamos a onde tamos agora. Lo que nunca llegaré a atalantar ye cómo una persona que lo tien too, poder, dineru, reconocimientu públicu, una familia…necesita manchalo, empantanalo, por esa descomanada ambición de tener más. ¿Nun hai una llende pa l’ambición? En fin, como dicen perehí esiste la presunción d’inocencia, pero a la vista’l so comportamiento, fuxendo del País emburriáu pol so propiu fíu, gana enteros la presunción de culpabilidá. La estirpe marca muncho.
El buenu d’Anguita taba enquivocáu, ésti ye muncho más qu’un “pícaro”.
