Hai unos 200 años, paezme que fue nel 1812, fundióse’l famosu «Titanic» nuna catástrofe que produxo 1.500 muertos. Ye un fechu que pasó de les páxines de socesos a les de la mitoloxía. Sobre’l «Titanic» sábese too: los nomes de los vivos y de los muertos. Cómo yeren los platos y los cubiertos. Los camarotes de les distintes categoríes y hasta la música que tocaba la orquesta mentanto’l barcu fundía.
De lo que ta pasando estes selmanes (pero que ya son años) nun se sabe nada: Nin la clas de barcos, por llamalos de dalgún mou, nin el númberu de los pasaxeros, sobre too de los muertos, nin muncho menos nomes o nacionalidaes. Lo que se sabe ye gracies a dalgún de los pocos sobrevivientes, que faen estimaciones de lo que pudo ser. Nun había botes salvavides, camarotes, nin muncho menos orquesta qu’acompañere a les víctimes nos últimos momentos. Tolo qu’arrodia a estos fundimientos del Mediterráneu, ye escuro, miserable, soez. Los muertos son númberos que se baraxen ensin que a naide-y importe unos cuantos más o menos. Ye namás pa facer la estadística. Y les imaxenes son tan brutales que naguamos por mirar pa otru llau.
Pero hai culpables nestos fechos, nun son accidentes de la ñatura que se vuelve escontra la humanidá. Hai culpables y hasta pue qu’haiga remedios pa que nun vuelvan a repitise. Lo que nun va a haber son ganes de solucionalos. Sí, agora que les imaxenes nos castiguen los güeyos y que se llevanta un clamor nesi que llamen «mundu civillizáu», los cabezaleros de la Comunidá Europea van facer que faen. Y van aconceyase, y sacarán comunicaos, y lleis. Y echarán la culpa a les mafies qu’especulen colos seres humanos, y a los barcos que tán en males condiciones, y a les fronteres que tán mal vixilaes… Too menos facer una autocrítica seria, y poner los medios pa qu’esto nun vuelva asoceder.
Italia, va un tiempu, y a la vista les catástrofes que socedíen nes sos costes, punxo en marcha un plan -el «Mare
Nostrum«- que nel tiempu que se caltuvo dio unos resultaos espectaculares: sólo nel añu 2014 rescató a 190.000 persones, porque yera un plan de salvamentu marítimu, con cantidá de barcos, aviones, submarinos, personal… Pero Italia nun podía asumir en soledá’l so coste (unos 114 millones d’euros), y tuvo que suspendelu. El plan de sustitución -el «Tritón»- nun prevee el salvamentu marítimu, ye namás de custodia y vixilancia de fronteres. Pa que nun haya entraes clandestines. El resultáu ta a la vista. Eso sí, ye muncho más baratu.
Pero ye que, amás, nun se trata sólo de salvar vides humanes, sinón de, na midida que se pueda, evitar que se pongan en riesgu aventurándose a unos viaxes emburriaos pola desesperación. La fame, sí, pero tamién el fuxir de les guerres, y d’esos campamentos de refuxaos onde falta de too. Les organizaciones non gubernamentales lleven años clamiando por unes axudes que nun lleguen, porque ye más fácil y sobre too más barato mirar pa otru llau. Nun sé si la vieya utre que ye Europa podrá siguir faciéndolo. Güei diz la prensa qu’un millón d’inmigrantes prepara’l saltu al nuestru continente. Si nun quieren poner los remedios afayaízos pa solucionar el tema, van tener que mandar a los barcos de guerra pa que fundan direutamente a los que traten de llegar. Porque la cosa yá nun hai quien la pare.
