Pásame con dalgunes persones, mayormente actores o actrices de cine, que me gusten más cuando son más mayores que de xovencinos. El casu más notable fue cola actriz Romy Schneider, que cuando fizo aquelles películes de “Sissi” o “Sissi emperatriz” paecíame una carina simpática y vulgar, pero cuando la vida la baqueteó y cumplió años y disgustos, tuve ciegamente namoráu d’ella. Y colos paisanos pásame lo mesmo, non lo del amor, sinón l’otro. Gustábame’l Paul Newman más mayorín qu’aquel de “Dulce pájaro de juventud” que de guapu, repunaba. Y Sean Connery tamién entra dientro d’esa categoría de los que me gusten d’un poco más mayores, ensin llegar a pochos.
L’actor escocés nun siempre me cayó bien, porque les primeres pelis de James Bond (y les últimes) yeren bastante panfletaries y siempre poníen a los rusos como malos y fatos, pero se conoz que fui derechizándome y yá nes últimes que trabayó facíame gracia como estereotipu que yera. Pero Connery fue muncho más que l’Axente 007, fue un gran actor. D’esos que te llena la pantalla y da igual de qué vaya la peli, o quién la dirixa porque él solu ya abasta pa salvala. Fue tan grande qu’hasta llegó a tapecer a otru grande como ye Harrison Ford nuna de les d’Indiana Jones na que tuvo xenial. Si tuviere qu’escoyer un par de los papeles nos que me más me prestó diría, claro, “El nombre de la rosa” y tamién “El hombre que pudo reinar”, xunto a un espléndidu Michael Caine. Pero, bueno, habría otres munches.
Na so vida privada siempre me paeció un poco “escéntricu”, y non por eso de que fuere un gran nacionalista escocés, sinón por otres coses. Pero eso nunca nun m’importó demasiao na mio consideración como actor. En fin, que se nos van morriendo los grandes, y vamos quedándonos colos pequeños, porque agora un Oscar gánalu cuasi cualquiera. Hasta Tom Hanks. Adiós, gran Sean, bienllegáu seas a esi cielu únicu de los grandes actores de tolos tiempos. Que la tierra te sea leve.
