Una de les meyores coses que traxo la tan mentada Constitución fue’l llaicismu. Ye dicir, qu’una cosa ye l’Estáu y otra la relixón. Y ésta, la relixón, tien de quedar pal ámbitu priváu y que cada quien faiga, nesi tarrén, lo que quiera. Eso nun niega la esistencia de colexos o universidaes privaes confesionales, onde’l catolicismu (la creencia mayoritaria) seya d’obligáu cumplimientu nin, por supuesto, l’asistencia a los llugares de cultu pa los que profesen esa o cualisquier otra relixón. Lloñe queden, gracies a Dios (como dixo dalguna vez don Santiago Carrillo) aquellos años qu’un (o seya, yo) sufrió nos sos años mozos, onde la práutica de la relixón católica yera práuticamente obligatoria, con aquelles Selmanes Santes nes que zarraben bares y cines y nun podíes cantar, o aquellos meses de mayo nel que nel Institutu Xovellanos, l’únicu qu’había entós, se cellebraba’l mes de les flores, dedicáu a la Virxen María. De too eso, qu’en dalgún sitiu tengo pormenorizao, podría yo dar clases particulares.
Pero hai otres coses, otres práutiques que, pese a tener nel so aniciu un calter relixosu, llegaron a convertise en dalgo tradicional, dalgo cultural, al marxe de creencies diverses, o de non creencies, como ye’l mio casu. Les Navidaes son una d’eses coses que, pol so calter particular, polo que representó a lo llargo de munchos años, tien un raigañu especial que caló en muncha xente. Na mio neñez, na que nun sabíemos que, en realidá, Navidá vien de Natividá, o seya Nacimientu. La cellebración del nacimientu de Xesús. Sabíemos que yeren díes familiares, felices, nos que los escaparates s’enllenaben de los xuguetes que’l restu del añu nos taben negaos (nun había’l derroche qu’hai agora), y qu’había una Cabalgata na que desfilaben los Magos d’Oriente que diben a dexanos un d’esos almiraos xuguetes. Y les cais adornábense con lluces y motivos navideños: Magos, neños Xesús, pastores… más tarde Papás Noeles, moñecos de nieve, trineos y renos…Y el día de Nochebona cenábase un poco meyor, y comíase turrón y, repito, too ello esperábase con una pallabra que me paez que se perdió nos vocabularios de la xente d’anguaño: ilusión. Recuerdo tamién el nacimientu que se ponía en casa mios padres, con aquelles montañes d’escayola, el mofu, l’estanque que yera un espeyu, con un puentín de corchu y unos patos nalando. Y Herodes, el malu, a la puerta’l so castillu con un par de soldaos a los llaos. Y el «misteriu», que siempre fue un misteriu. Una tradición que yo, que nun soi creyente, heredé y que sigo poniendo cada añu, anque seguro que con menos arte que mio madre.
Esta Navidá salgo poles cais d’un Xixón ilumináu y noto que falta dalgo. Eso qu’enantes se llamaba «espíritu navideñu». Y paécenme un poco vergonzantes eses lluces ecléctiques, neutres, desprovistes de cualquier niciu del pasáu, nun vaya a ser que dalgún «llaicista» lo critique: «¡Oiga, equí nengún rastru relixosu, eh!». Confundiendo la velocidá col tocín, y la relixón coles tradiciones que vienen de mui lloñe y que son les que nos tocó vivir. Pa bien o pa mal. Pero les nuestres. Y dalgún de los que tea lleendo esta entrada camentará: «Esti Oliva cada vez ta más facha». O el llistu de turnu dirá en voz alta: «Lo qu’echa de menos ye la so infancia, por eso nos llarga esti rollu». Y yo digo que sí. Que seguro que ye eso. Lo cuál nun quita pa que note la falsedá d’unes Navidaes, ensin Navidá. Falsificaes. De cartón piedra. Anque-y reconoza a la muyer que sí, que ye verdá, que la iluminación quedó «mui fina».
