Ún dase cuenta de lo vieyu que ye, cuando siente al so alredor la muerte de persones que tuvieron un espaciu na so educación sentimental. Persones a les que nun conoció personalmente, pero que fueron más o menos importantes en diverses estayes que formaben la so vida: artistes de cine, futbolistes, cantantes…
Pue que’l nome d’Estela Raval nun-y suene muncho a la xente de la mio edá, pero seguro que sí-yos sonará’l del grupu del que yera l’alma mater: «Los Cinco Latinos». Esti grupu, a finales de los años 50 y primeros de los 60, arrasaron nos «hit parade» de mediu mundu, incluyío n’España onde actuaben siempre a sala enllena. Arxentina de nacencia, Estela tenía una voz maraviosa con unos rexistros imposibles de llegar pa la mayoría de los cantantes. Como me da un poco galbana poneme a mirar na Rede datos de canciones o de la so biografía, diré namás que recuerdo, ente otres munches versiones suyes, una del «Only You», de los Platters, y otra de «You are my destiny», que cantaba otru ídolu de la dómina como yera’l canadiense Paul Anka, práuticamente inmeyorables. Llueu Estela siguió la so carrera en solitario, pero abúltame que yá ensin tantu ésitu como’l d’aquellos años, en que yera imprescindible en toles discoteques, caseres o públiques. Yo tenía dellos discos de «Los Cinco Latinos», de los que se llamaben de 45 revoluciones, y que teníen un tamáñu intermediu ente los L.P. y los singles. Y escuchábalos nun tocadiscos d’aquellos de maleta. ¡Qué tiempos…! En memoria de los bonos ratos que me fizo pasar Estela Raval, deseo daveres que descanse en paz.
