Don Enrique Miret Magdalena.-
Lleo nel periódicu la muerte del escritor, filósofu y teólogu don Enrique Miret Magdalena y siento la necesidá de poner unes lletres nel so homenaxe. Nos escuros años de la Dictadura, don Enrique (con un «don» mui bien ganáu) yera una lluz qu’allumaba’l panorama éticu y relixosu español. Dende les páxines de l’añorada revista Triunfo (¡cómo vos echo de menos, Monleón, Haro Tecglen, Vazquez Montalbán…!) Miret combatía él solu (otros lo facíen dende otres estayes) escontra l’ensame de cures, obispos y cardenales que pretendíen facer d’España una sociedá confesional y reaicionaria, allancada nel atrasu y la superstición. Don Enrique, qu’amestaba a la so firma’l títulu de Teólogu seglar, criticaba dende la so columna la connivencia ente la relixón y el poder y dábanos argumentos, a los qu’un día fuimos cristianos d’andar per casa, pa defender les nueses creencies. Home realmente sabiu, citaba igualmente a los grandes teólogos de la Ilesia, como a los sociólogos más modernos de mou y manera que les sos opiniones yeren incontestables. Defensor d’un Dios bonu, en llugar de xusticieru, y d’un Xesucristu allegre, en vez d’esi eternamente «enoxáu», llegó a los sos 95 años escribiendo y publicando llibros d’ética y humanidaes, anque yo diba yá tiempu que nun lu lleía. Prestaríame que daveres esistiere esi cielu de los xustos qu’él tanto defendió, pa qu’agora pudiere gociar d’él. ¡Que la tierra-y seya leve!
