close
Nel día de güei, cautivu y desarmáu…

Nel día de güei, cautivu y desarmáu…

2012-02-13310Visitas

ultimo-parte-de-guerra«Nel día de güei, cautivu y desarmáu l’exércitu de los trabayadores españoles, tienen algamaos les fuercies de la derecha, los banqueros y los grandes empresarios los sos últimos oxetivos llaborales. La guerra ta terminada.»

Podría paecer una broma l’asonsayamientu qu’acabo facer del caberu parte de la Guerra Civil española, pero’l proyeutu de llei de Reforma Llaboral ye poco menos qu’un parte paecíu. Con él, retrocédese a unos tiempos pasaos en que los trabayadores nun teníen nengún tipu de garantíes nel empléu, nin nes condiciones llaborales, nin nel salariu y caún buscábase la vida como podía. Tiempos nos que nun esistíen sindicatos que pudieren negociar unos convenios coleutivos, dexando al trabayador desarmáu delantre del patrón que, empresa por empresa, tenía nes sos manes el futuru de caún d’ellos como amu y señor de les sos vides. Con esti proyeutu de llei, desármense los sindicatos, los mínimos abellugos llaborales, les mínimes compensaciones pol despidu. Esti proyeutu de llei ye una vuelta al capitalismu selvaxe y a la docilidá y a la resignación d’una clas trabayadora que, d’un plumazu, torna a unos tiempos que yá pensábemos superaos. Con esti proyeutu conságrase’l despidu llibre, la rebaxa de los salarios, la fin de los convenios coleutivos, la marxinación d’unos sindicatos que fueron decisivos, nun sólo na llucha por unes condiciones dignes de trabayu, sinón mesmamente na llucha política escontra tantos años de Dictadura. Si yo fuere nesti momentu un de los que col so votu fizo posible qu’esto llegare, ataríame, como na Biblia, una piedra de molín al pescuezu y tiraríame al mar.  Porque, amás, too esto, y ellos sábenlo, nun va a sirvir pa crear más empléu. Si nón, al tiempu.