Va unes poques hores enteréme del fallecimientu de la mio apreciada profesora d’Historia Antigua, de la Universidá d’Uviéu, Amparo Pedregal. Anque la nuestra relación fue la xusta ente profesora y alumna, creo poder reseñar d’ella dalgunos aspeutos destacables tanto de la so persona como de la so actitú docente. Amparo yera una muyer intelixente, culta, activa feminista, trabayadora, escelente comunicadora, elegante, atrautiva, bona profesora y extraordinaria investigadora, pero too esto cuntaránlo estos prósimos díes compañeros y profesores que tuvieron la suerte de tratala más que yo, polo que namás amestaría un aspeutu al que suel dáse-y poca importancia pero que yo valoro muncho: yera mui ocurrente. Les sos observaciones podíen sacar del amuermamientu al más tochu de los alumnos. Recuerdo un seminariu nel que pola naturaleza del discutiniu -¿fue Roma imperialista o non?- alumnes y alumnos interveníemos con pasión esceutu un pequeñu grupu que, ayenu al debate, xuxuriaba pa ente sí y al que, Amparo, atayó con tonu grave: “¡Que hable el Sanedrín!”
Doctora Pedregal: Sit tibi terra levis
Amalia Trancho
