Dícenme que, entrugáu Abelardo mister del Sporting, pola posibilidá de que dimitiere a la vista’l desastrosu percorríu que ta faciendo’l so equipu, contestó: «Yo soi un funcionariu del Sporting, ellos póneme nel sitiu que quieran». Nun sé si esto fue asina, pero si lo fue, la contestación ye «de pata bancu». Siguiendo esi razonamientu, el Sporting tenía que tener en plantiya a tolos entrenadores que tuvo dende tiempos inmemoriales, menos a los qu’hubieren muerto o marchao pola so propia iniciativa. ¿Funcionariu? Non, usté nun fizo nengún esamen, nin pasó nenguna peñera pa ser l’entrenador del equipu xixonés. Usté, como tolos entrenadores, entró «a deu», escoyíu con mayor o menor aciertu, por una xunta direutiva que lu contrató pa esa misión en concreto: entrenar al primer equipu del Sporting. Cuando les coses van bien, pues mui bien, pero cuando van mal hai qu’apechugar con ello y, si se tien dignidá, dexar el cargu pa que venga otru que lo faiga meyor.
Ta claro que non siempre ye l’entrenador el culpable del destín del equipu. Como nesti casu, los xugadores y los que los ficharon nun tán al altor que reclama un club señeru como ye’l Sporting. Pero d’eso a llavase les manes diciendo qu’él ye un funcionariu, hai un abismu. Entiendo, que’l propiu Abelardo intervino nel fichaxe de la mayoría de los xugadores, xunto con esi Nico Rodríguez que vino pa eso. De fechu, y ehí ta na prensa pa relleelo, depués de los 12 fichaxes que se ficieron esti añu (¡doce!) dambos dixeron que l’equipu yera meyor que’l del añu pasáu. Y llueu, toos sabemos y Abelardo tamién, que’l destín d’un entrenador ta lligáu a los resultaos que vaya algamando. Si la cosa va bien, ye’l meyor del mundu. Si va mal, él ye’l culpable. Pasó hasta col lloráu Preciado, al qu’agora xuben a los altares, pero que nel so día echaron polos malos resultaos d’aquel añu.
Abelardo diz que pue sacar al equipu d’esta situación. Nun paez. Ensin un sistema -pasó yá media Lliga y nun sé sabe a qué xuega l’equipu, faciendo pruebes toles selmanes- ensin espíritu, garra, amor propiu… toes aquelles virtúes que’l xixonés supo tresmitir años anteriores, el Sporting ye un náufragu metanes una tormenta. Más da la impresión de qu’esa cantinela repítela pa caltenese nel puestu. Ye indiferente qu’Abelardo nos caiga bien o mal -a min nun me cae mal colos defeutos qu’otres veces ya dixi- pero creo que’l so ciclu nel Sporting yá finó. Queda media Lliga por xugar. Meyor ye apostar por daquién con nuevu puxu y nueves idegues pal equipu y agradece-y a Abelardo los servicios prestaos. Nun sé si se tará tovía a tiempu, pero polo menos hai que lo intentar. ¡Ah! Y que busque otra disculpa: lo de funcionariu nun cuela.
