De magar se destapecieron los negocios puercos del maríu la Infanta, cola necesaria collaboración de la so muyer, como diz el xuez Castro, les autoridaes de Palma de Mallorca d’onde ostentaba’l títulu de Duque, decidieron quitá-ylu. Nun sé en qué quedó aquello y si un títulu, como’l de Duque de Palma, pue quitase a petición de la sociedá a la que nombra. Pero debería ser asina. En Palma sentó mui mal, como ye llóxico, toes aquelles groseríes ensin gracia del «Duque… empalmado» y nun digamos que, dalguién que debería llevar el so nome como dalgo de prestixu, pueda ser un desfalcador y un embusteru.
Yo, dende estes páxines del blogue, metíme un cientu veces col «nuestru principín». Al mio modestu talantar, nun merez llevar el títulu de «Príncipe de Asturias», pues lo que fai ye actuar, en tou casu, como Príncipe, pero non precisamente d’Asturies. Nenguna vinculación tien cola nuestra cultura, llingua, historia (a parte la imposición de Juan I), tradiciones, etc. Porque yo nun entiendo como tal, venir a presidir un actu «universalista» nel que nunca nun cita a naide de la tierra, y dar, cuando toos yá colaron, un premiu a un pueblu por tar bien decoráu. Asturies merez otros reconocimientos, otros enfotos, otres preocupaciones.
La gota qu’enllenó’l mio vasu (habrálos que tengan más aguante) fue la del otru día en FITUR. Resulta que’l citáu Príncipe
de Asturias, xunto cola so Princesa, inauguraron esa importantísima feria mundial de turismu y visitaron, xunto a los pabellones industriales y tecnolóxicos, otros que recueyo de la prensa: «Los Príncipes también han tenido tiempo para visitar algunos de los stands de las comunidades autónomas y comprobar la oferta turística de las mismas, entre ellas las Islas Canarias, Extremadura, Euskadi, Cataluña y Galicia, repartidas entre los pabellones nueve y siete.» «En su recorrido han contado con la compañía también del presidente de la Xunta de Galicia, Alberto Núñez Feijóo; el presidente del Gobierno de Canarias, Paulino Rivero; el presidente del Govern Balear, José Ramón Bauzá; y el presidente de la Junta de Extremadura, José Antonio Monago.»
Oiga, ¿y Asturies? El Príncipe d’Asturies, con títulu na nuestra tierra, debiere tener como una de les sos prioridaes la defensa y el reconocimientu en tou tiempu y llugar de lo nuestro. De lo suyo. Debería pasar pol stand asturianu TOLOS AÑOS, como dalgo d’obligáu cumplimientu. Más, cuando la nuestra/so comunidá, ta pasando per unos momentos sociales y económicos mui malos. Güei titula’l diariu El Comercio: «Asturias revisa su política turística ante el estancamiento del sector» Un sector que ta pasando por momentos permalos. ¿Nun debería, el Príncipe que lleva’l nuestru títulu, axudar a la meyoría d’esi sector, diendo a visitalu y falando d’él nun marcu como FITUR? Si nin siquiera val pa eso, ¿pa que nos val? Poro, esti que firma, dende esti modestu blogue, pide a quien correspuenda qu’anicie los trámites que faigan falta pa quita-y el títulu d’Asturies al herederu de la Corona. Que siga siendo Príncipe Herederu, pero que nun s’adorne col nome d’una tierra que merez que se la represente dalgo meyor.
