close
Nun yera modestia, yera inorancia

Nun yera modestia, yera inorancia

2013-07-20476Visitas

Javier Fdez.Munches veces tenía pensao que la mudez o les poques pallabres emplegaes pol nuestru presidente autonómicu, don Javier Fernández, debíense a la so estremada modestia. Yá ye hora, pensaba yo, qu’haya un altu cargu políticu que nun nos tea dando lleiciones tol tiempu, nin que faiga declaraciones pomposes o estemporanies, nin siquier que caiga en baxos populismos como’l famosu Revilla col Rei. Tamos, por fin, delantre un políticu trabayador y calláu. Podrás compartir o non lo que fai, pero él va a lo suyo en silenciu y con modestia.

Ocurre que pa una vez que sal de casa (salió enantes al estranxeru y dixo babayaes al rodiu del nietu (¿o del fíu?) de Pachín de Melás, pero debió ser el «Jet lag») fizo que munchos asturianos nos punxéremos coloraos. Porque esa conferencia que dio na menos que na capital del Reinu (bono, peor, en San Llorienzu del Escorial) nun ye pa menos que p’avergoñanos. Va pocos díes, y en vista de les tensiones nacionalistes y los xareos col so grupu «hermanu» catalán, el PSOE sacó «un papelín», amosando la so postura en favor d’un Estáu Federal. Ya primero lo anunciare n’otres ocasiones, amagando pero ensin dar, pero esta vez fízolo por escrito. Como tien de ser. Lo de menos ye que’l papelín nun valga pa ná, el casu ye la bona voluntá: como los toreros.

Yo dende esti modestu blogue pidía a la FSA que nos desplicara la so postura ante esi Estáu Federal que los suyosPi i Margall promueven, entrugando por aquello del «fechu diferencial» y eses «mandangues» de les que falen los sos xefes, y he equí la contestación del modestu del nuestru presidente. «La reforma federal del Estado español»: Conferencia. Nun hai mayor cantidá de babayaes xuntes, tópicos, y ensinsentíos que lo que sal nel resume de La Nueva España del 17 d’esti mes, supongo que fielmente. El nuestru «presi» dedicóse a «cantinflear» al rodiu del federalismu, con un llinguax que paecía de coña. Pa finar diciendo, con voz engolada, (eso supóngolo yo) que la reforma constitucional que proponen «no sería juridicamente posible ni políticamente conveniente» ensin el consensu con otros partíos. ¡Toma yá! Eso ye dalgo que se da, non n’Educación pa la Ciudadanía, sinón hasta nos mesmos parvularios. Amás que si nun ye xuridicamente posible, yá nun importa si ye o non «politicamente conveniente», puesto que nun podría facese. O seya, aquello de que «la campana nun tien mayuelu». Pero al marxe de los topicazos, lo que más revienta ye esi xuegu de ser el «federalizador desfederalizáu», porque cómo pue salir a defender un Estáu Federal dalguién al que nin-y presta nin, polo que se ve, lu entiende. Yo entiendo que Fernández nun seya independentista, nin siquier nacionalista, pero lo que nun entiendo ye entós por qué sal a proponer un Estáu Federal que supón un pasu más nel desarrollu de les autonomíes. Por modestu que seya un Estáu Federal, siempre será daqué más que lo que tenemos, nel camín del autogobiernu. ¿Si non, qué sentíu tien? Anque al final, como los malos illusionistes, descubre’l trucu. Él quier un Estáu Federal pa frenar a los catalanes. ¡Coime, entós pidi un estáu centralista, que ye lo que daveres quies y déxate d’amoriar la perdiz y engañar al respetable. En fin, lo dicho, resultónos que’l nuestru «presi» nun falaba, non por modestia, sinón por inorancia… o por maldá, que ye peor. ¡Si el probe de don Francisco Pi y Margall llevantara la cabeza…!