A LES TRES DE LA MAÑANA.- Paez ser que la viéspora del «Zapaterazu», el señor Presidente de los Estaos Xuníos, un tal Barak Obama, llamó al nuestru «presi» pa dicí-y que bien, que val, que lo del Pautu de les Civilizaciones y eses mandangues son mui prestoses pa cuando nun hai nada meyor, pero que, agora, el capitalismu anda esboroñándose y nun podemos andar con caxigalines. Hai que meter la tiyera peronde ye más fácil (ya sabes, Zapa, xubilaos, pensionistes, funcionarios y otra xente de «mal vivir») y aforrar perres pa dales llueu a los banqueros que son xente más serio. Yo hasta ehí, entiéndolo. Home, a parte entendelo podía calificalo, pero eso ocuparíame munchu espaciu. Lo que yá nun entiendo ye que pa dicir eso, el señor Obama lu llame ¡a les tres de la mañana!. Coime, nun podía llamalu a eso de les diez o les once, cuando tuviere cenando… O ye que se-y ocurrió sobre la marcha. Tamién pue ser que, al igual qu’otros presidentes d’EE.XX nun sabe mui bien ónde ta España, y eso del cambiu horariu cree que ye como con México. En tou casu, eso abre un calce nuevu. ¿O seya que val eso de llamar a les tres de la mañana…? Mui bien. Pues entós nosotros tamién podemos llamalu a esa hora: «Oye, Obama, ¿cómo va eso de Guantánamo, yá lo tenéis trancao?» Y otru día, a la mesma hora: «Amigu Barak, ¿lo del bloquéu a Cuba va pa munchu tiempu?, ye que nun lleguen les melecines.» Y coses asina. Y ye que nun hai como un amigu de confianza.
LES VENTE MIL PIECES DE SAN CHUÍS.- Bueno, en realidá yera por facer un chiste, porque les 20.000 pieces nun yeren del castru de San Chuís, sinón del de la Campa Torres. Sí, ho, les que guardaron nun «zulo» pa que tuvieren fresques y se conservaren meyor. Pena que se perdieren los lletreros, pero les pieces tan como nueves. Yá pasó más d’un mes d’aquello y entovía nun dimitió naide. ¿Ye que nun hubo responsables o ye que-yos paez bien lo que pasó? Ye un bon exemplu pal futuru. Esto, amás choca con tol tema de lo del muséu de Grandas. Resulta qu’ellí echen «a pataes» al so direutor, un reputáu etnólogu, por defeutos alministrativos y por tener les coses «enguedeyaes» y nombren sustitutu al que dexó la Campa Torres como un bebederu patos. ¡Pues menudu arreglu que van facer! Pero nun importa, val too. ¿Qué pasare en cualquier otru país civilizáu colos responsables d’esta barbaridá? ¿Nun habría dalguna dimisión? Equí danos too igual. Dientro poco surdirá otra nueva llaceria ecolóxica, cultural, llingúística, patrimonial… y nada. Un par de díes nos periódicos, aguantar un poco’l bastiazu y ¡hala! ¡Aupa Sporting! Yá nos volverán a votar otra vuelta… Yá lo dixi en dalguna otra ocasión: toi pensando en faceme catalán.
¡QUÉ POCO PINTAMOS!.- Y nun me refiero al oleu, sinón a lo poco que representamos dientro’l contextu del Estáu Español. Les coses que pasen n’Asturies tienen nula repercusión a nivel estatal, a nun ser que, otra vuelta, una muyer seya asesinada pola so pareya. Eso sal siempre en primera plana. Hubo equí dos socesos deportivos d’importancia va bien poco: El Club Patín Biesca, de La Calzada quedó, otra vuelta, CAMPEÓN D’EUROPA, por tercer vez y con más méritu que l’añu pasáu, porque la so meyor xugadora coló pa un equipu catalán onde-y pagaben meyor (bueno, onde-y pagaben). Pero les sos compañeres, echándo-y xeniu y calidá, revalidaron el títulu. ¿Salió daqué na prensa madrileña, incluyíos dos diarios que namás que ponen deportes…? Como dicía Dylan, la rempuesta ta nel vientu. L’otru fechu, la cellebración, con abondes dificultaes y pilancos, de la Vuelta Ciclista a Asturies. Lo mesmo: más alló del Payares, nada de nada. Nun yá televisalo pola segunda cadena, como faen cola vuelta a cualquier otra comunidá, ya inclusive la Vuelta a Normandía y o a la Baxa Saxonia, sinón nin siquiera dar l’anuncia nel Telediariu. Anda, Dylan, tócala otra vuelta.
GARZONIANA.-Yá dixi lo que tenía que dicir nel so día sobre’l tema de Garzón (ver «Delenda est Xudicatura», entrada del mes de marzu). Güei, agora que yá se zarra’l círculu, namás quiero dicir qu’unos cuantos ultraderechistes, unos cuantos narcotraficantes, unos cuantos etarras y unos cuantos corruptos, tarán brindando con «champan». Va a tener razón aquel conceyal del P.P. que falaba de «la puta democracia».
