UNA CULTURA «PLAXADA».-
El gobiernu asturianu contrata con una empresa catalana un informe sobro les industries culturales asturianes. Esi informe espublízase col pomposu nome de «Libro Blanco de la Cultura Asturiana». Mui orixinal. Enterámonos depues que la mayor parte del trabayu, por nun dicir tou, ye copiao d’otres publicaciones, dalgunes d’elles colgaes n’Internet. Lo primero que me llama l’atención ye qu’haiga que facer l’encargu a una empresa catalana. ¿Nun hai n’Asturies xente enforma capacitada pa facer esi trabayu? ¿Sedría pensable que la Generalitat encargara a una empresa asturiana un informe sobro la cultura catalana? ¿Si nós mesmos nun confiamos y damos les perres a los nuestros, quién va a facelo? Y depués de descubiertu’l plaxu lo que procede nun ye defender a la empresa catalana, sinón arma-yos la de coyer y quita-yos les perres. Ye que tán tomándonos por fatos.
LES MIGAYES D’HEVIA.-
Nel discursu d’aceptación del nomamientu d’Hevia como Miembru d’Honor de l’Academia, faló ésti de les migayes que siempre nos tán dando a los asturianos/asturianistes. Como exemplu de lo dicho por Hevia ta’l casu de la Financiación Autonómica. Los nuesos representantes dicen tar contentísimos col resultáu de la negociación, debe ser que lo esperaben entovía pior. De los 11.000 millones ufiertaos pol Gobiernu Español, Asturies recibe 200. Pol so llau Cataluña (que debe ser la que perdió) recibe cuasi 4.000. La cuenta ye que, con siete veces más de población qu’Asturies, Cataluña recibe cuasi veinte veces más de perres que nosotros. La cosa nun me paez a mi pa tar tan contentos. Izquierda Xunida allégrase tamién porque esperábenlo pior. Coime, pues si nun tas conforme siempre te queda’l recursu de nun lo firmar y denuncialo. ¿O hai que callar pa siguir nel Gobiernín?
¿QUE HAI QUE FACER PA QUE DALGUIÉN DIMITA?
El Tribunal Superior de Xusticia d’Asturies anula’l Plan d’Ordenación Urbana de Xixón. Igual qu’enantes pasó col Gobiernín Asturianu, que dos importantes lleis les declararon illegales, naide nun dimite. Pero ¿en manes de quién tamos? ¿Qué país de coña ye ésti nel que les instituciones se caltienen al marxen de la llei? Y ye que, amás, nun-y dan importancia. Ná, son defeutos de forma. ¿L’impactu ambiental?: Ye una cosa alministrativa. ¿Diránlo daveres? ¿Nun- yos paez importante? Coño, pues la forma ye importantísima. La forma ye la que dicta qu’una cosa seya llegal o non. Si nun respetamos la forma volvemos al Oeste. O, nel casu nuestru, volvemos al Sidrón. ¿Qué amparu tenemos los ciudadanos más que pedir que se cumpla la forma? La forma abellúganos de les arbitrariedaes y, como se ve nestos casos, permítenos recurrir lo que ta mal fecho. El plan d’ordenación d’una ciudá ye, xunto cola de presupuestos, la llei más importante de los ayuntamientos. Si nin siquiera saben facer bien esto ¿a qué esperen pa dimitir?
EL «MUSELAZU».-
Taba más visto que’l tebeo que’l furacu negru del Musel acabábemos pagándolu los asturianos. Primero facíase con fondos europeos, nun diba a costanos nin un euru. LLueu surdió el «sobrecostu»: Ná, tranquis, si nun lo asumen ellos (teníen que ser fatos) págalo’l Gobiernu de Madrid. Y, coime, resulta qu’agora tenemos que lo pagar nosotros colos presupuestos del Gobiernín. ¡Güeyu! Tamos falando de 300 millones d’euros, unos cincuenta mil millones de pesetes. Y ye que, a lo meyor, de saber que díbemos pagalo nosotros igual preferíemos gastalo n’otra cosa. Amás foi una obra dafechamente innecesaria, como diximos unos cuantos nel momentu de plantegase. Lo importante nun ye’l tamañu, que tamañu yera suficiente, lo importante son los tráficos y la xestión comercial. Asina vamos tener un megapuertu, pagáu coles nuestres perres, pa una actividá mínima. Lo dicho: ¿nun sabrán conxugar el verbu dimitir, ho?
