¿PA CASA?.- Acaben salir les llistes del PSOE pa l’alcaldía de Xixón. La verdá ye que son bastante deceicionantes. Pocu pesu políticu, lo que quier dicir obediencia a les pautes que-y vengan al partíu dende fuera. Ente les cares «nueves», vuelve doña Carmen Veiga, depués de facer tou un «slalom» políticu per otros puestos del partíu: A los sos 62 años actuales, yá fue conceyala nel primer ayuntamientu democráticu con José Manuel Palacio d’Alcalde. Presidió la Fundación Municipal de Servicios Sociales. Tuvo cargos de responsabilidá na Cruz Roxa y dirixe’l Teatru Xovellanos dende 1999. Agora, dando la vuelta al mundu políticu n’ochenta díes, vuelve de conceyala. Nun ye una esceición. Los políticos, sobre too los de los partíos que gobiernen, nunca se xubilen. Pasen d’unos puestos a otros, d’unes estayes a otres, siempre viviendo de la «corexa pública». Pocos son los que vuelven al so antiguu oficiu, que dalgunos nun sabríen nin cuál ye. Por eso cuando agora diz el periódicu que cinco conceyales socialistes nun renueven y marchen pa casa, hai que-yos enmendar la plana y dici-yos: «¿Pa casa?. D’eso nada. Pa otros puestos, a siguir «tirando del tetu»
ACABOSE’L «MUSELÓN», ¿Y AGORA QUÉ?.- Tinikamon y Nefertiti-Felgueroso yá tienen la so pirámide construyida.
Quedará como un homenaxe al grandonismu del so reináu: Diques de 3,8 kilómetros de llargo y 24 metros d’alto. Una dársena qu’equival a 145 campos de fútbol; una enorme llanada pa empreses y servicios ganada’l mar, de superficie asemeyada; muelles con 27 metros de caláu, onde podríen entrar los mayores barcos del mundu… Y xunto a eso, otra cifra descomanada: los costes y sobre costes entovía ensin axustar, al rodiu de 720 millones d’euros. ¿Y agora qué? ¿Cómo s’enllena eso? ¿Cómo se rentabilicen eses perres? Dalgunos diximos cuando se presentó’l proyeutu que yera dalgo innecesario. Que’l problema del Musel nun yera tanto de tamañu como de xestión. Y que, en tou casu, si se facía, tenía que ser con un ampliu consensu políticu y ciudadanu. Nada d’esto-yos encartió. Tiraron p’alantre ensin nengún control económicu nin d’otra mena, y gracies que la presión ciudadana consiguió camudar el proyeutu inicial que quería Tinikamón, entovía muncho más agresivu col mediu ambiente. Bien, pues yá puen ponese a trabayar pa da-y rendimientu al «superpuertu», nun vaigan tener que facer como colos restos de los antiguos faraones: que venga’l turismu a ver la nuestra «Pirámide de Keops».
«AMINISTÍA INTERNACIONAL» SUSPENDE A LES FUERCES DE SEGURIDÁ EN DRECHOS HUMANOS.- La formación en Drechos Humanos de les Fuerces de Seguridá sigui siendo marxinal. Ye la cimera conclusión d’un nuevu informe d’ Amnistía Internacional que cuntó col sofitu del SUP (Sindicatu Unificáu de Policía) y de la AUGC (Asociación Unificada de la Guardia Civil). Entrambos, denunciaron les carencies formatives nos cuerpos y fuerces de seguridá del Estáu, y la falta de voluntá política pa enanchar el conocimientu de los Drechos Humanos nos conteníos de los programes d’enseñanza. La so defensa y abellugu (la de los D.H.), namás representa el 4% de tola formación que reciben los axentes. Recalcándose tamién que nun se preste atención a la tema del racismu y la xenofobia, nun contestu d’acoyida d’inmigrantes y aumentu de la multiculturalidá n’España. Saltando, tamién, penriba de la tradicional presencia de la etnia xitana, con problemes de discriminación y esclusión social. Pal que quiera más información, déxo-y esti enllaz: www.es.amnesty.org
«CUANDO L’AMU NUN VIXILA LA CASA…» .- Un tal Carlos Varela, a lo que paez fiscal superior de Galicia, anima a la
Xunta (a la suya) a que «fomente» l’usu del gallegu na fastera asturiana del Eo-Navia. Aliéndala, tamién, a potenciar la radio y la televisión gallegues n’esi territoriu. De momentu nun diz nada d’unviar «comandos» o al exércitu gallegu dafechu. Sedrá el siguiente pasu de la «reconquista». Y ye que la Historia ye mayestra. Cuando l’amu de la casa nun la vixila, los lladrones terminen robando. Si les autoridaes asturianes proclamaren la oficialidá del asturianu, y la del «gallego-asturianu» na so estaya, agora nun tendríemos qu’aguantar las tochures invasionistes del fiscal gallegu que, a lo que paez, tamién entiende de llingüística. No único no que tien razón esi Varela ye que n’esa zona asturiana, los falantes tán nun «limbo» xurídicu». Y yo amiesto: n’esa y en tol restu’l País. Porque los falantes asturianos tamién lo tamos mentantu nun haya oficialidá. Tenémoslo «crudo»: ya dixo’l pretendiente al tronu real que, «anque nun supunxere imposición, nunca habría oficialidá». Polo menos ésti ya quita la «mázcara».
