UN EXEMPLU DE CIVISMU.- Soi de los que, dacuando, túvime reído de los xaponeses al velos perehí pel mundu, arrecostinando cola cámara de semeyes, en grupos siempres compactos, formando una especie de «rebaños» que, repito, siempre te mueven al comentariu coñón. ¡Qué superiores nosotros, los europeos, tan llistos, tan individualistes, tan civilizaos…» Pues bien, esos mesmos xaponeses acaben danos (polo menos a min), una lleición de civismu nunes circunstancies estremes. Vi les imáxenes: nun comerciu esbarrumbáu, onde nun se calteníen en pie nin les parés, y cola mercancía al ventestate, los xaponeses formaben una cola ordenada, con aspeutu esmolecíu pero serenu, aguardando selemente a que’l comerciante los atendiere. Nada de robos, nin pilleríes, nin revueltes en cais, tiendes, bancos o medios de llocomoción. Una serena esmolición. ¿Qué tuviere pasao si nos asocediere a nosotros el mesmu casu? Dame mieu sólo de camentalo. Poro, otra vuelta, enantes de riíme de naide o facer chancia d’otres cultures o civilizaciones, voi pensalo dos veces. Los xaponeses acaben dame una bona lleición.
UNA GRAN ENTREVISTADORA.- Qu’Ana Pastor ye una gran entrevistadora selo dende va tiempu. De la que me
llevanto, acurioso’l cuartu y faigo la cama, pongo na tele piquiñina’l programa «Los desayunos de la 1», que conduz maraviosamente la Pastor. Les sos entrevistes siempre son fondes y sustancioses, fuere quien fuere l’invitáu, y del signu políticu al que perteneciere. Con ella nun valen les rempuestes superficiales, afonda nel tema y acorripia al interllocutor hasta facelu contestar lo que daveres piensa. En pocu tiempu, fizo agora dos mui bones, una al Presidente d’Israel, Simón Peres, y la más recién al líder iraní Mahmud Ahmadineyad. Y nun ye sólo que-y entrugara bien, ye que, amás, hai que tener munchu valor pa, na propia capital d’Irán dir a interesase polos opositores encarcelaos, o pol tema de les llapidaciones d’homosesuales o muyeres. Lo del pañuelu que se vio obligada a ponese, y que terminó ensin él, ye namás una anéudota. Yo que lo vi en direuto, dime cuenta que-y fue esbariando y que nun se decató d’ello. La mio norabona a Ana. Y una cosa más. Tamién Ahmadineyad tuvo razón en dalgo de lo que dixo: ¿Quién caltuvo nel poder, durante 40 años, a esos dictadores qu’agora ametrallen al so pueblu y hai que los derrocar? ¿Y quién suministró les armes coles qu’agora tán ametrallando a esi pueblu que tanta pena nos da? Son entrugues que tamién habría que contestar.
¿NUCLEARES? ¡NON, GRACIES!.- Ye verdá que les circunstancies qu’estos díes se dieron en Xapón son esceicionales, pero eso nun quita pa que nos amosaren, una vuelta más, la pelligrosidá d’una enerxía que ye cara (la instalación d’una planta d’enerxía nuclear ye costosísima), puerca (el tema los residuos ta ensin iguar, poniéndose «parches») y, como vemos, pelligrosísima. Amás, d’un pelligru nun sólo inmediatu, sinón pa un futuru de munchos años per delantre. ¿Podemos permitinos esi luxu? Ye verdá que, nesti momentu, les enerxíes renovables entovía nun tán en condiciones de sustituyir dafechu al petroléu, al carbón o a les nucleares, pero esa ye una apuesta qu’hai que facer porque, lo que ta en xuegu, ye tan importante como la propia supervivencia del planeta y, poro, del xéneru humanu. Quiciás nun se puedan quitar d’un plumazu toles centrales nucleares, pero habrá que dir faciéndolo pasu ente pasu, principiando, claro, poles más vieyes y en peor estáu. Y, ensin ser bruxu, voi facer una predicción: Yá veremos como Xapón, que ye vanguardia en nueves tecnoloxíes, en non munchu tiempu, va encontrar un sistema enerxéticu que vaiga sustituyendo toes eses centrales que tienen llantaes nel so país, la mayoría d’elles, amás, mui cerque del mar. ¿Dalguién quier apostar?
