LA REAL ACADEMIA… ¿DE QUÉ HISTORIA?.- La publicación, va unos pocos díes, del Diccionariu Biográficu Español, presentáu «a bombu y platiellu» ante la prensa, supón el descubrimientu d’un requexu d’ideoloxía franquista, depués de trenta y munchos años de la muerte’l Dictador. Biografíes de personaxes de la II República y de la Guerra Civil, asina como la del propiu Franco, tienen un «tufu» fascista impropiu d’una época y d’unos supuestos profesionales de la Historia. La biografía del Dictador fízóla, pa más Inri, un xixonés: Luis Suárez Fernández, cuya especialidá teórica ye la Historia Medieval, pero qu’equí s»escoyó asina mesmu pa contar la vida de Francisco Franco Bahamonde. Luis Suárez ta arreyáu a la Fundación Francisco Franco (a cuyos fondos nun puen acceder otros historiadores), ye Presidente de la Hermandad del Valle de los Caídos y miembru del Opus Dei. Y la mio cenciella entruga ye: con estos antecedentes, ¿cómo una Academia como la d’Historia permite qu’esti paisano faiga la biografía d’un de los personaxe más nefastos del mundu modernu? El Presidente de la Real Academia, Gonzalo Anes, dixo que cada historiador ye responsable de la reseña que fizo, pero eso nun ye serio. Tien d’haber un equipu científicu que revise la totalidá de los biografíaos, y si se detecten casos como esti, hai que los retirar enantes de la so publicación. Nun pue permitise que con dineru públicu, más de 6 millones y mediu d’euros, venga naide, por mui historiador que se llame, a manchar la memoria de tantos muertos víctimes de la represión franquista.
CON 21 AÑOS DE RETRASU.- A veinte y un años de la fecha en que’l xesuita español Ignacio Ellacuría y otros cinco
compañeros, más dos muyeres que trabayaben con ellos, fueren asesinaos a sangre frío polos militares salvadoreños, el xuez de l’Audiencia Nacional don Eloy Velasco, acaba dar orde de busca y apresamientu internacional a 20 cargos responsables de la matanza. El primeru d’ellos, el Ministru Salvadoreñu de Defensa naquella dómina. Los cargos son de asesinatu, terrorismu y crímenes de lesa humanidá. Nun sé cuántos d’ellos tarán vivos entovía, nin si dalgún día podremos velos pagar los sos crímenes, pero’l solu fechu d’esta declaración xudicial ya nos reconcilia cola Xusticia. Ye lo menos que-yos debemos a aquellos lluchadores pola Paz y polos probes y marxinaos del mundu.
UN SALTU P’ALANTRE.- El movimientu llamáu del 15M (tan dándonos tantes feches que bien ceo nun vamos saber a qué nos referimos), tamién conocíu como «Democracia Real, Agora» o de los «indignaos», pretende esparder les sos actuaciones, na menos qu’a esfera mundial. Ye cierto, y dicíalo yá l’otru día, que tolo que nun seya dir p’alantre sedrá dir p’atrás, polo que la intención de da-y una dimensión más grande al fenómenu ye acertada. Nun ye difícil el contaxu, porque los problemes que planteguen los rapazos españoles nun son muncho estremaos de los del restu’l mundu, anque siempre coles dimensiones propies de ca casu. Nel Español, claro, los 5 millones de paraos y el 45% de paru xuvenil. En cualquier casu, a min paezme acertao dar el saltu. Pero conformaríame con que la cosa prendiere namás n’Europa, lo cual siempre sedría más fácil. El restu’l mundu tien otros problemes propios que quiciás nós nun tenemos. Tamos mal, pero entovía tenemos unes sociedaes abondo más evolucionaes que n’otros munchos sitios. Principiar por Europa nun sedría poco.
PASTILLES ESCONTRA’L DOLOR AYENU.- Yá sé que soi pesáu, y que falé d’esti tema n’otres ocasiones, pero ye que
los problemes siguen tando ehí y la nuestra axuda sigue siendo necesaria. En cualquier farmacia, cuando vaigas a comprar dalgo, o dafechamente a por elles, pide les «Pastilles escontra’l dolor ayenu». Namás por 1 euru (¿qué yes a mercar con un euru?) vas a consiguir que Mélicos ensin Fronteres siga tratando a 11.000 persones de VIH-sida en Zimbabue. O a 4.000 pacientes del mal de Chagas en Bolivia. Como dicíen nel Mayu del 68 en París: «Sei solidarios, y non solitarios».
